State pawn player nen Khatla TBL

MBBA 1st Division tournamnet hnuhnung berah khan Khatla TBL hi an champion a, Mizoram Super League hmasa bera champion tura rinkai an ni.

Nitin zingah emaw tlai lamah emaw a remchan dan a zirin Chawnpui Indoor Stadium leh Hawla Indoor-ah te practice an nei ṭhin.

An player zingah coach/player H.Laldinsanga (Mapuia) an neih avangin he team hi chhe thei an ni lo. Mapuia hi senior level-a India tan pawha lo khel tawh kha a ni.

State pawn aṭangin players pahnih National Games neih zawh taka Tamil Nadu tana inlan Pratham Singh leh Punjab tana khel Amjyot Singh Gill te an lalut bawk a, anni pahnih hi senior level a India tan pawha lo inlan zak zak tawh an ni a, an ṭhatpui leh pui loh an khelh hunah kan hria ang.

Khatla TBL secretary Samuel Lalfana chuan, "Pathian zarah tluang taka kan khelh a, tuna kan khelh dan anga kan khelh theih reng chuan champion theih kan inbeisei. Game a nih vangin engmah sawi lawk theih a ni lo a, buatsaih erawh kan inbuatsaih ngawrh khawp mai," tiin a ṭawng pawr duh lo.

Khatla TBL hi khawtlang an phur a, February 14 zana Khatla YMA Hall a Khatla Basketball Nite an hman naah fans T-Shirt zawng zawng an hralh zo nghal vek.

Fans T-Shirt hi siam belh niin tunah subsidise rate-in Rs 150 in an hralh chhuak leh mek.