Champion tum ngam Ryders

Kum 1998 khan Chaltlangah Ryders basketball club hi Junior Mipa leh hmeichhe team siamin din a ni.

Ngurkhumi Halliday-te in kawtah home court neiin an din kum hian mipa junior-ah an champion nghal a ni.

Hun reitak club a din mumal theih loh hnuah kum 2013 khan dinthar leh a ni a, third division aṭang a bul ṭan ṭha lehin hemi kum hian third division-ah an champion leh nghal a ni. Kum 2014 khan second division champion ni leh a, MSL khel turin an inhlangkai chhunzawm zui bawk.

Player ṭha tak an kawl khawm mek a, chung zingah chuan an captain Lalmuanpuia Zote, Ramhlun North leh Lalbiakzuala (G-tea) Bethlehem te hi an rinrawl tur a ngaih an ni. An captain Mapuia hi 2014 season-a second division-ah most valuable player a thlan a ni a, Mizoram aiawhin under-16 Jaipur-ah a lo kal tawh bawk. G-tea pawh hi player ṭha tak a nih bakah coaching pawh pe thei tura MBBA certificate nei a nih avangin a tawnhriat leh theihna te an chhawr hle tur a ngaih a ni.

Kumin January 12 aṭang khan Chaltlang Diet basketball court-ah zing leh tlaiah ah an practice ṭhin a, chubakah chuan Chawnpui-ah a remchan dan a zirin zanah an practice ṭhin bawk. Practice ṭha taka an neih theih avangin an player te pawh fit hle tura beisei an ni.

Ryders hi Zoplast, Chanmari; Sony Showroom, Chanmari; L.T. Enterprise, Chaltlang; AMW, Chanmari; Zoram Indane Services, Chaltlang te'n an sponsor a, Chaltlang Veng mipui aṭangin ṭawi­awmna an hmu ṭha hle bawk.

Ryders manager Vanlalbiakropuia chuan, "Kan inbuatsaihna a ṭha a, tha leh zung mai bakah sum leh pai tam tak sen na a nih avangin champion ngei kan tum a ni," tiin Vanglaini palai a hrilh.