Zarkawt BCA an phur

Kum 2010 khan Biak­chunga hriatrengna atan BCA Basketball club-hi din a ni. A tirah chuan third division aṭangin bul an ṭan a, MBBA-in tournament a buatsaih hrang hrangah ṭum 11 final lut tawhin vawi sarih lai an champion tawh bawk. Kum tin hmasawn chho zelin kum 2014 khan first division-ah an inhlangkai ta a ni.

Player senior an nei nual dawn a, tumhma deuh Mizoram basketball la lar tak tak hma aṭang pawh a lo khel tawh ṭhin player an nei nual dawn a ni. Tuna an player zingah Ramthar veng tlangval pahnih Zorinsanga leh Laremsanga te chu an innghahna tur player pawimawh an ni.

Anni hi national camp-ah pawh lo awm tawh an ni. Champion pui tham an ni dawn em tih chu ka hmu thuai dawn e.

MSL atana inpuahchah dan

Kumin January 7 aṭang khan Zarkawtah nitin tlai dar 5-7 ah an practice ṭhin a, player te an fit ṭha tawh hle a ni. Player-te an phur tlang a, an inbuatsaihna pawh a ṭha thawkhat hle. BCA hian hian coach/player atan R. Liansangpuia an hmang a, Dawrpui tlangval Lalruatfela chu assistant coach a ni.

BCA hi Hotel Regency chuan an sponsor ang.

BCA manager Malsawm­tluanga chuan,"MSL atan hian kan theih tawpin kan inbuatsaih a. Player ṭha tak tak leh coaching staff ṭha tak kan neih avangin kan phur hle a ni. Mi ṭhenkhatin fans nei tam lo turah min ngai ṭhin a, mahse hei hi a dik tawk lo a ni. Kuminah hian Champion ngei tumin kan bei dawn a ni," tiin Vanglaini palai a hrilh.