Barca-in Real an um zel

Pathianni zan khan Barcelona-in Lionel Messi hat-trick bakah Neymar leh Luis Suarez te goal khung hmangin Levante 5-0 in an sawp. Catalan club hian point 56 hlawhchhuakin hmahruaitu Real Madrid nen an inkarah point khat chauh a awm.

Camp Nou-ah mual­neitu Barcelona-in inkhelh ṭan tirh aṭanga a tawp thlengin ro an rel tluan a, Levante-in chetna hun an nei meuh lo. Minute 17-na lekah Barca-in Brazilian forward Neymar goal hmangin hma an hruai a, Messi Show in a a chhun­zawm nghal bawk. Argentina captain Messi-a'n minute 38-naah Barca goal hnihna a khung a, second half-ah goal hnih dang khung lehin hattrick a siam.

Catalan club an khel ṭha zel a, Liverpool striker hlui Suarez-a'n minute 73-naah mawi takin a volley goal a, Barca 5-0 in an chak.

Luis Enrique enkawl Barca team hian an game hnuhnung 11-ah an chak vek a, 2008-09 season-a Pep Guardiola enkawlna hnuaia Barcelona chak zawn rei record nen a intluk chiah.

Goal machine 'Messi'

Kum 27-a upa Messi-a'n La Liga-ah Barcelona tan game 300 a kheng tling ta chiah a, season kal mekah goal 26 a khung tling leh der tawh. Levante lama Messi hattrick siam hi La Liga-a a vawi 23 hat-trick siamna chiah a ni.

Messi hian inelna hrang hrangah club tan ṭum 31 tehmeuh hattrick a siam tawh a, La Liga-ah goal 269 zet a thun tawh bawk.

Boss kamchhuak

Barcelona manager chuan, "Record siam hi a ṭha a, a pawimawh ber chu result ṭha neih a ni. Title lak hi a harsa em em a, team ṭha tak tak nen kan inel reng avangin theih tawp kan chhuah reng a ngai a ni. Champion ngei turin kan bei zel ang" tiin a sawi.