Bradford an kal zel

FA Cup aṭanga Chelsea paih chhuaktu Bradford-in Pathianni zan khan Premier League club Sunderland 2-0 a hnehin kum 1976 hnua a vawi khatna atan FA Cup quarterfinal an lut. Wembley Stadium thleng turin match khat chiah an mamawh tawh.

Valley Parade-ah Sun­derland-in record ṭha tak an nei a, a zawnin vawi ruk an chak tawh. Amaherawhchu Pathianni zanah erawh mualneitu Bradford-in bul ṭan ṭha zawk. Bradord forward Billy Clarke ball petin Black Cats defender John O'Shea a per a, minute thumna lekah 1-0 a ni.

Bradford an khel ṭha chhunzawm a, goal hnihna khung tumin an goal bawh a na hle. First half-a goal dang a luh belh loh hnuah second half-ah Sunderland tan Adam Johnson-a'n an siphurh a sut teuh a, amaherawhchu Bantams defender Meredith-a'n a dang hman hlauh.

Sunderland-in goal an khung ve mai dawna a lan laiin Johnson-a ball clear ṭhat tawk loh chu Bradford stiker James Hanson chuan a tauh let a, kum 31-a upa Jon Stead-a'n Manchester United defender hlui Wes Brown bumin yard 12-na aṭangin goal hnihna a khung.

Sunderland supporter inkhel entu 4000 lungawilote manager Gus Poyet chung­ah an ṭuan a, Braford supporter te'n Uruguayan manager au elin 'Naktuk zingah an ban dawn che' a ti dual dual bawk.

Bradford boss Phil Parkinson chuan, "Suppor­ter-te aṭangin ṭawiawmna kan nei ṭha em em a, kha khan player ṭha lehzualin a khelh tir a ni. Chelsea kan hneh tawh a, Sunderland kan hneh leh a, chutichung chuan team chhe zawka

ṭan kan duh. Wembley thlen ngei kan duh a, quarterfinal kan khelmuala khelh leh chu kan duhthusam a ni," tiin a sawi.

Sunderland manager Gus Poyet chuan, "Cup inelna chu a danglam a ni. Team pahnihin chak tumin kan khel ve ve a, kan vanduai a ni. Team lian zawkin team te zawk an hneh zel chuan Cup hlutna a awm lo ang," tiin a sawi.

Fan chungchang sawi chhunzawmin, "Supporter-te chungah lungawi lohna ka nei lo. Result ṭha ka neih loh chuan keimah hi a tuartu tur chu ka ni. Ka chet ṭhat loh zel chuan ban theih ka ni," a ti.