Lyon-in point khat hlawhchhuak

Ligue 1 hmahruaitu Lyon-in hmahruai belhchhahna hun an hmang ṭangkai thei lo a, Inrinni zanah PSG leh Caen inhnehtawk mah se Pathianni zanah Lorient an draw hram.

Stade du Moustoir-ah first half-ah goal a lut lo a, minute 50-naah Lorient tan Jordan Ayew-a'n hmahruaina goal a tauh lut. Lyon-in an si phurh hi Clinton N'Jie hmangin minute 77-naah an sut a, Cameroonian forward N'Jie-a goal hi Henri Bedimo siam sak a ni.

Lyon manager Hubert Fournier chuan, "Kan chauh vang a ni lo. Hmahruaitu kan nih vanga pressure hi kan tlin lo a ni. PSG hian pawisa an hman tam avangin champion rinkai a ni a, keini erawh player quality nei ṭha kan ngah loh avangin chetsual chang kan nei ṭhin. Chutihrualin champion ngei erawh kan tum thung," tiin a sawi.