Aston Villa an chak
FA Cup quarterfinal thleng turin Pathianni khan Aston Villa-in Leicester City 2-1 in an hneh a, manager thar Tim Sherwood-a'n mipui ṭhutna aṭangin inkhel hi a thlir.
Villa Park-ah first half-ah goal a lut lo a, minute 68-naah Leandro Bacuna-a'n nalh takin a hlai lut a. Minute 89-naah Scott Sinclair-a'n Villa goal hnihna a khung a, injury time-ah Leicester tan Andrej Kramaric-a'n goal khat a khung ve bawk.
Aston Villa hi tun hnaiah an result a ṭhat loh avangin an manager Paul Lambert an ban a; inkhel entu pawh an tlem hle. Mipui 42,682 lenna stadium-ah entu 28,098 chauh an awm.
Sherwood hian Villa hi la enkawl chiah lo mah se halftime-ah dressing room-ah inhmelhriattirna hun leh fuihna hun a hmang a. Second half-ah Spurs manager hlui thawhrah a lang a, Villa-in hnehna an chang.
Aston Villa manager lai lawk Scott Marshall chuan, "Kan khel ṭah hlein ka hria, team angin kan khel chhuak a ni. Amaherawhchu hun tawp thlenga ṭang tur kan nih laia injury time-a goal kan chhuah erawh inenfiahna tur a tam khawp mai," tiin a sawi.
Leicester City manager Nigel Pearson chuan, "A tir minute 15 chhung kha kan talbuai a, khami hnu khan insiamṭha mah ila second half-a ball kan chang rei thei lo kha kan lama goal a luhna chhan chu a ni. Match khat aia tam kan khel ṭha thei lo hi kan buaina a ni," tiin an sawi.