Ireland-in 'comeback' ropui an lantir

Thawhṭanni zing khan ICC World Cup-ah beisei loh result a thleng a, Saxton Oval, New Zealand-ah rin loh zawk Ireland-in West Indies an hneh.

West Indies an bat hmasa zawk a, opener Dwayne Smith leh Chris Gayle te an che ṭha lo. Smith hian ball 24 a hmachhawnah run 18 a siam tihin a out a, innghahna Gayle-a'n beisei a phak lo a, ball 65 a hmachhawnah run 36 chiah a siam tihin kum 22-a upa George Dockrell-a'n a vawm out.

Kum 18 a nih aṭanga Ireland tana khel tawh Dockrell hi inkhelah hian a che ṭha a, run 50 chiah pein wicket thum a la a, catch vawi hnih a nei bawk.

Amaherawhchu West Indies tan Lendl Simmons leh Darren Sammy te'n danglamna an rawn thlen a. Simmons hian ball 84 a hmachhawnah run 102 a vawchhuak. Sammy pawh a khel ṭha takzet a, ball 67 a hmachhawnah run 89 vawchhuakin dinhmun duhawm takah West Indies an hlangkai a. Over 50-ah West Indies-in run 304 vawchhuakin mi pasarih an out. Ireland tan um phak huphurhawm tak a ni.

Ireland hun a thleng a, Paul Stirling chuan ball 84-ah run 92 a vawchhuak a. Ed Joyce (84) leh Niall O Brien (79) te'n half century an siam bawk. Ireland-in over 45.5-ah run 307 vawchhuakin mi paruk chauh an hloh a, hnehna an chang.

Ireland hian ICC World Cup-ah record danglam tak a nei a, West Indies an hneh hma hian 2011 World Cup-ah England leh Netherlands te chu run 300 chuang an siam hnuaah lo hneh tawh a ni.

Anni bakah hian ICC World Cup-ah England leh Sri Lanka te'n run 300 chuang target ṭum khat ve ve an lo umpha tawh bawk.