Giroud-a'n laipui vawi hnih a kap puak

Pathianni zan khan FA Cup-ah Arsenal an inlan a, Arsene Wenger-a hote'n Championship club Middlesbrough lakah champion zia lantirin 2-0 in hnehna an chang.

Emirates Stadium-ah French forward Olivier Giroud-a'n first half-ah goal hnih a khung a, champion lai Arsenal-in FA Cup quarterfinal an lut.

Middlesbrough hi Championship club ni mah se a zawnin match ruk hnehna an chang tawh a, kum 20 chhunga an chak zawn rei ber ṭum a ni. Emirates Stadium-ah chak ngei an tum a, North London-ah supporter 5,280 zet an zin chhuak.

Arsenal player thar Gabriel Paulista chuan tlar hnungah a vawi khatna atan starting eleven-ah a chang a, inkhel an thunun avangin hna a ngah lo hle. Boro chance neih hmasak ber Albert Adomah ball pet chu keeper Wojciech Szczesny-a'n awlsam takin a lo dan sak.

Boro-in Manchester City 2-0 a an hneh ṭuma an keeper Tomas Mejias an hmang a, amaherawhchu Arsenal tlar hma lakah Mejias-a'n goal a venghim zo lo. Minute 27-naah Santi Cazorla leh Kieran Gibbs te thawhrah sengin Giroud-a'n a ke vei lamin Arsenal hmahruaina goal a khung.

Goal luh aṭanga minute hnih hnu lekah Alexis Sanchez-a corner chu Giroud-a'n nalh takin a volley lut a, 2-0 a ni.

Second half-ah Middlesbrough-in tlar hnung an rem phui a, an goal bawh erawh a na chuang lo. Injury time-ah Spanish striker Kike-a'n goal ban a tauh per a, hei bak hi goal khung theihna tur an nei lo.

Boro keeper Meijas-a'n goal hnih a chhuahna chungin goal dang luh belh tur erawh a dang ṭha hle. FA Cup-ah Boro-in beisei tur an nei tawh lo a, season thara Premier League tlin chu an tum ber tur a ni. Tunah hian Championship-ah hmahruaitu Bournemouth nen point 59 ve ve an hmu a, vawi khatin an khel tlem thung.

Eng nge an sawi?

Arsenal manager Arsene Wenger chuan, "Bul kan ṭan ṭha a, inkhel kan thunun a, kan khelh dan hmang kha a ṭha thlawt a ni. 2-0 a nih hnuah kan khelh dan a tla hniam a, mah se kan khelh danah ka lawm khawp mai. A pumpuia thlir chuan inkhel kan la thu tak hlein ka hria," tiin ka sawi.

Wenger-a chuan, "Olivier Giroud kha a hriam em em a, Arsenal a rawn zawm tirh nen chuan a inthlau tawh takzet a ni. A che rang a, a thiam a, training a la thutak bawk. Tunah chuan player ṭha ber zing ami a ni tawh," tiin a sawi.

Player thar Paulista chungchang sawiin, "Gabriel Paulista khan box chhungah ṭha takin tackle a nei a, goal venhim kha nuam a tih zawng a ni. Hmanhmawh hun a hria a, a lian

ṭha a, a thiam tel bawk. Ṭawng a la thiam loh avangin harsatna a nei a, mah se player fing tak a nih avangin a ṭhiante khelh dan aṭangin game kalhmang a man chak hle," tiin Brazilian defender-in sapṭawng a la thiam loh vanga harsatna a neih thu a sawi.

Middlesbrough manager Aitor Karanka chuan, "Arsneal ang a team ṭha khelhpui hi chu a harsa a ni. Set piece aṭanga goal chhuah a, tihsual neih bawk chuan insiamṭhat a har tawh ṭhin. Theithawp chhuaha khelh kan tum a, amaherawhchu first half kha chu kan khel ṭha tawk lo a ni. Manchester City leh Liverpool te kan khelh ṭum ang khan kan theihna kan phochhuak tawk lo a ni," a ti. Boro hian League Cup-ah Liverpool hun pangngaia an draw hnuin, penalty shootout-ah an hneh lo.