PSG-in Chelsea an mikhual dawn

UEFA Champions League knockout stage chu zanin aṭangin khelh ṭan a ni dawn a, Europe-a club ṭha inelnaah club 16 chiah an dam tawh.

Zanin dar 1:15 hian Paris Saint Germain-in Parc des Princes-ah Chelsea an mikhual dawn a, French champion leh Premier League hma­hruaitute inkhel tur hi a hmuhnawm ang.

Head to Head

Thla 11 liam ta khan Paris-ah PSG-in Ezequiel Lavezzi leh Javier Pastore-te goal bakah David Luiz-a own goal hmangin Chelsea 3-1 in an hneh a, Brazilian defender Luiz hi tunah PSG player a ni tawh. Chelsea hian khualmualah hnehna chang lo mah se Stamford Bridge-ah substitutes Andre Schurrle leh Demba Ba-te goal hmangin PSG hi an hneh a, Jose Mourinho team-te hi away goal rule hmangin an chak.

2004/05 season khan club pahnih hi group khatah an awm dun a, Portuguese manager Mourinho-a'n Champions League-a Chelsea a enkawl hmasak ber ṭumin Paris-ah PSG hi 3-0 in an hneh. Khami ṭuma Chelsea starting eleven zingah keeper Petr Cech, John Terry leh Didier Drogba te chu tun thlenga London club tana la khel an ni. Hemi season hian Stamford Bridge-ah goal awm loin an inhnehtawk.

Season liam ta khan PSG hian last 16-ah Bayer Leverkusen sawpin quarterfinal an lut a, an khelmualah European Competition-ah a zawnin match 32 (22 wins, 10 draws) chhung hneh loh an tawng tawh lo. PSG hian English club ṭum kua an hmachhawn tawh a, an record chu vawi hnih chak, vawi thum draw leh vawi li chak lo a ni. An chak vawi hnih hi an khelmuala thleng a ni.

Chelsea hi ṭum ruk zet France ramah inkhel tawh mah se kum 2004-a PSG an hneh tih loh kha chu chak an nei lo. Chelsea hian nikum khan last 16-ah Galatasaray hnehin quarterfinal an lut a, semifinal-ah Atletico Madrid lakah an tlawm.

Club pahnih inzawmna

PSG defender Luiz hian kum 2011 khan Chelsea aṭangin Paris club hi a zawm a, London club tan vawi 81 khelin goal ruk a khung. Chelsea-in Champions League an champion ṭum khan Brazilian defender hi a khel tluan a, penalty aṭangin goal a khung bawk.

1996-97 season khan PSG boss Laurent Blanc chu Barcelona player a ni a, Barcelona-a coach Bobby Robson hnuaiah tuna Chelsea boss Mourinho hi coaching staff-ah a tel.

Club pahnih hian Brazilian player an kawl nual a, PSG-in Thiago Silva, Luiz, Lucas leh Marquinhos an nei a; Chelsea-in Filipe Luis, Oscar leh Ramires te an nei thung.

PSG an buai

Blanc-a team-te hian Inrinni khan League-ah Caen laka 2-0 a hma an hruai hnuin 2-2 in an inhnehtawk a, player inhliam an kawl nual bawk. Chelsea hmachhawn turin Serge Aurier, Johan Cabaye, Lucas, Marquinhos, Blaise Matuidi leh Javier Pastore te dinhmun a chiang lo a. Chelsea player-ah erawh Obi Mikel chiah chiang lo a awm thung.

Eng nge an sawi?

Chelsea player pawimawh Eden Hazard chuan, "League Cup final-ah Tottenham kan hmachhawn dawn a, League-ah hmahruaitu kan ni bawk a. Tun season-ah inelna pathumaah kan la champion thei a, Champions League erawh a la harsa dawn khawp mai," tiin a sawi.

PSG manager Laurent Blanc chuan, "Caen lakah point thum hlawhchhuah ngei kan tum a, kan hlawhchham. Tuna kan hmabak chu Chelsea a ni a, player inhliam vangin a awlsam dawn lo," tiin a sawi.