Juve leh Roma an chak zo lo

Serie A-ah hmahruaitu Juventus chu an khingpui Cesena nen 2-2 in an inhnehtawk a; pahnihna Roma leh Parma-te goal awm loin an inhnehtawk bawk. Juve hian point point 54 hmuin hmahruaitu an ni chhunzawm zel a, Roma-in point 47 hmuin an dawt.

Pathianni zan inkhel dangah Inter Milan-in an khingpui Atalanta chu khual mualah 4-1 in an sawp thung.

Juve an chesual

Cesena-in league hmahruaitu Juventus lakah bul an ṭan ṭha a, minute 17-na lekah Milan Duric-a'n hmahruaina goal a khung.

Minute 10 hnuah Juve tan Real Madrid player hlui Alvaro Morata chuan minute 27-naah an siphurh a sut a, Italian midfielder Claudio Marchisio-a'n minute 33-naah Juve hmahruaina goal a khung zui bawk.

Cesena-in second half-a striker Franco Brienza goal khung hmangin an si phurh an sut zo a, inkhelh tawp thlengin goal dang a lut tawh lo. Chilean midfielder Arturo Vidal chuan chakna goal khung theihna hun ṭha a neih chu a bawh pelh a, minute 82-naah penalty a pet goal lo a ni.

Juventus coach Massimiliano Allegri chuan, "Kan khel ṭha lo hle a ni. Player-t'en game-ah an rilru an pe tawk lo a ni. Penalty kan pet goal lo khan kan vanduai tih a nemnghet," tiin a sawi.

Hun ṭha bawhpelhtu Roma

AS Roma-in Juventus nena an inthlauhna ti zim turin an hun ṭha neih an hmang ṭangkai zo bik lo.

Stadio Olimpico-ah inkhel an thunun a, amaherawhchu an mikhual Parma lakah goal an khung lo. Roma tan Arsenal player hlui Gervinho leh Adem Ljajic te'n an goal khungna hun ṭha neih an hmang ṭangkai zo lo a. Chelsea defender hlui Ashley Cole-a'n Roma tan hun tawp dawnah a volley goal teuh viau bawk.

Inter an chak

Season thara European Competition khelh tum Inter-in an khingpui Atalanta lakah an mamawh point thum an hlawhchhuak.

Inter-in bul an ṭan ṭha a, Bayern Munich aṭanga loan hmang­a an lak Xherdan Shaqiri-a'n minute hnihna lekah penalty aṭangin an hmahruaina goal a khung. Mualneitu Atalanta tan Maxi Moralez-a'n minute 27-naah an siphurh a sut a, first half-ah 1-1 a ni.

Second half-ah Inter an che ṭha a, minute 53-naa Atalanta defender Yohan Benalouane hnawhchhuah a nih zui avangin mualneitu an che thei lo.

Inter tan Colombian midfielder Fredy Guarin a che ṭha a, goal hnih a khung a; Ro­drigo Palacio-a'n Inter goal lina a khung leh bawk.