Coronavirus hmanga fiamthu Alli-a'n ngaihdam dil

Tottenham Hotspur midfielder Dele Alli chuan tun hnaia hri leng lar tak coronavirus chungchanga fiamthu a thawh chu ngaihdam a dil a, "Keimah leh club ka ti mualpho hle a ni," a ti. 

Kum 23 mi Alli hian Snapchat lamah a fiamthu video hi a pholang a, thlawhtheihna ṭum hmunah a hmai tuam chungin Asian hmel pu pakhat leh a bula 'antiseptic' kut silna chu a 'zoom' a ni. 

Alli hian a thil tih hi a dik lo tih hriain a delete leh vat a, Chinese social media platform lar Weibo lamah a ngaihdam dilna a tichhuak lehnghal a ni. 

England international chuan, "Thil nuihzatthlak loh tak a ni tih ka hria a, ka delete leh vat a ni. He natna hi fiamthu thawh nana hman chi a ni lo a, China mipui zawng zawngte tan ka ṭawngṭai a ni," a ti. 

Coronavirus avang hian mi 900 chuangin an nunna an chan tawh a, khawvel pumah case 40,000 vel lai report a awm tawh a ni.