East Bengal chona thlirlawktu Fowler

Liverpool legend Robbie Fowler chuan East Bengal-ah chona hmachhawn tura a inpeih tawh thu a sawi a, English striker ropui ṭhin chuan, "Ka tan chuan league thar a ni a, chona insiam hi ka duh a ni. 

"Team thar, league thar hmachhawn tur an ni - team thar ka tih chhan hi ISL a an season hmasa ber tur a nih vang a ni a, he club hi kum 100 zet a kal tawh a ni," a ti a, Kolkata club a enkawl thei tur chu a inchhuan hmel hle. 

Fowler chuan, "Nghakhlel takin ka club thar ka enkawl hun tur hi ka thlir a ni. Team dang ai chuan kan tlai deuh a, mahse ka theihna leh min puitu turte theihna hi ka hrechiang em em a ni," tiin a inringtawk hle. 

A-League club Brisbane Roar boss hlui chuan, "Club nena sawi-zawm in nih chuan in tih hmasak ber tur chu club chanchin zirchian a ni a, an sulhnute pawh uluk taka en a ngai a ni. East Bengal leh ISL club dang inang tak chu ATK Mohun Bagan hi a ni. 

"Derby boruak sang takah ka team chu an inchiah pil hneh hle. Mohun Bagan nen kan inkhelh hun chuan India rama mi maktaduai tam takin min thlir dawn a ni.

Kuminah chuan a hmunah entu an awm dawn lo a, mahse nakkumah erawh mipui nuai telin a hmunah min en dawn a ni," tiin a phur hle. 

Kum 45 mi Robbie Fowler hian East Bengal-ah hian kum hnih cham turin contract a ziak a, amah vang ringawt hian Kolkata club hian ngaihven an hlawh lehzual ang.