Arsenal defender thar Riccardo Calafiori

Champion tur chuan tlarhnung phui a pawimawh hmasa, tih thupuiah an nei a ni mai thei - Arsenal chuan an tlarhnung thuam chak turin Riccardo Calafiori an lalut a, season nga daih inremna an ziahpui.

Kum 22 mi Calafiori hian Italian club Bologna aṭangin Gunners hi a zawm a, a man zat hi poiund makatduai 42 thlenga sang chho thei tur a ni - kum 2029 thleng cham turin Emirates Stadium hi a pan.

Arsenal a thlang

Euro 2024 khelh zawh takah khan Calafiori hi Italy tan a inlan - Arsenal bakah hian Juventus leh Real Madrid bakah Premier League club ṭhenkhat chuan lakluh an duh, mahse Calafiori hian Mikel Arteta kaihhruaina hnuaia khelh a thlang ta zawk.

Calafiori chuan, "Coach Arteta bakah Edu nen thla hnih deuh thaw chu kan in bia. Anni chuan Emirates Stadium pan turin min thlem a, min thlem hma pawh khan a nihna takah chuan Arsenal zawm kha ka duh daih tawh.

"Hma thlir tam tak ka nei ve a, chumi ti hlawhtling thei tur chuan he hmun hi ka pan. Hmasawn zel chunga nomawi chawi ka duh, squad naupang rual leh hmabak nei êng tak zinga tel ve hi ka duh a ni," a ti.

Italian defender hi tlarhnung laiah leh left back atan a hman theih. Calafiori chuan, "Khawi hmunah zawk nge ka khelh dawn tih hi sawi chian fak a ni lo a, ka enghelh ber a ni lem lo bawk.

"Inkhelh tam ka duh a, hmasawn ka duh bawk. A pawimawh ber chu team lamin min mamawhna laia inkhelh theih leh match khelh tam kha a ni zawk," a ti a, coach Arteta-a'n a duhna laiah a hmang thei dawn tihna a ni.

Nipui bazar hmasa khan Bologna hian Swiss club Basel aṭangin Calafiori hi an lalut a, a man zat chu pound maktaduai 3.4 a ni. Season khat hnua an hralh lehna nen a intlau hle, mahse an hralhna man chanve hi Basel lamin an la chang ve thung ang.

Arteta mi duh

Arsenal hian Premier League season hmasa khan goal 29 chauh an chhuah, English football inelna sang berah hian goal chhuah tlem ber an ni, match 38 aṭanga match 18 zetah chuan goal an chhuah lo.

William Saliba, Gabriel leh Ben White te an chhawr rim a, anni bakah hian Takehiro Tomiyasu, Oleksandr Zinchenko leh Jakub Kiwior te a la nei a, hliam vanga an chhawr theih loh reng Jurrien Timber a dam tawh bawk.

Tlarhnungah chhawr tur nei ṭha tawk viau mah se an la duhtawk loh avangin Calafiori an lak belh. Arteta chuan, "Tlarhnungah player ṭha tak tak kan nei sa a, mahse kan la duhtawk loh avangin midang kan melh.

"Calafiori hi kum khat chhung kan enthla tawh a, kan mi duh tak kan chang thei hi ka lawm hle. Player kan ngah tawk lohzia hriatna chu, season hmasa khan William Saliba hian EPL match a khel kim a, minute zawng zawng a khel vek," a ti.

Arsenal manager chuan sawi zawmin, "Vawi hnih khat kan va biak khan club dang pawhin an bia tih ka hre reng mai a, mahse chutiang karah chuan kan hnena lo kal a thlang. English a hmang thei a, inpawh taka kan inbiak theih avangin kan duh chu a hria," tiin a sawi.

Calafiori tan tan hmun nghet chan ngawt chu thil awlsam a ni dawn bik lo. United States lamah Gunners training a zawm nghal a, coach mit a tlung a nih chuan EPL season thar bul ṭan turin a inpeih hman ang, elpui tur erawh a nei hautak dawn tih a chiang.

Arsenal insiksawi

Tun nipui bazar chhungin Arsenal hian player pahnih an lei nghet tawh. Calafiori hma hian Brighton aṭanga loan hmanga an hawh David Raya chu an la nghet a, Spanish goalkeeper manah hian pound makatduai 27 an seng.

Hetih lai hian an midfielder Emile Smith Rowe erawh a chhuak dawn. Gunners academy chhuak hi Fulham chuan an player man tam ber ni turin an lalut dawn, a man zat hi pound maktaduai 34 thlenga sang chho thei tur a ni ang.

A tirah chuan Fulham hian pound maktaduai 27 an pe phawt ang, chumi hnuah pound maktaduai sarih dangin a la sang leh thei dawn - England international hian inkhelh tam duh vangin a chawr chhuahna club a chhuahsan dawn a ni.

Kum 23 mi Smith Rowe hian theihna sang tak a nei a, a lakah beiseina pawh an nei sang ṭhin. Mahse, hliamin a tlakbuak fo, a inkhelh tam loh laiin Gabriel Martinelli, Leandro Trossard leh Bukayo Saka te chu nek chhuah ngaihna awm loin an lo nghet hman.

Mikel Arteta-a kaihhruaina hnuaiah, tun hnai season hnih chhung chu Arsenal hi Premier League champion an ni teuh dun hle, mahse hun pawimawhah Pep Guardiola enkawl Manchester City an ngam lo leh ṭhin, hei vang hian squad tih chhah zual an duh.

Tlarhma lamah Gabriel Jesus leh Kai Havertz te duhkhawp lotu tam mah se hmatawng ṭha tak buaipui dang an nei rih lo a, tuna a lan dan chuan Real Sociedad midfielder Mikel Merino an ngaihven ngawrh ber a, lakluh tumin hma an la mek.