Vawiin aṭangin GIG Motors I Day Football: Chanmari FC Vs SYS; Ramhlun Athletic Vs Bethlehem VT
GIG Motors I Day Football Tournament chu vawiin aṭangin RG Stadium-ah an khel dawn a, MPL club pariat bakah ISL club NE United leh ADFA First Division club Bethlehem Vengthlang te an inel dawn.
Vawiin chhun dar 12:00-ah MPL11-a hmahruai mektu Chanmari FC leh beisei phak baka che ṭha SYS FC te an inkhel ang a, tlai dar 3:30-ah MPL club thar Ramhlun Athletic FC leh Bethlehem VT FC te an inkhel ang. Group A-ah hian vawiin inkhel tur team pali bakah Sihphir Venghlun FC an la awm.
Group of Death
Group B-ah Aizawl FC, Mizoram Police, Chawnpui FC, NE United leh FC Bethlehem te an awm a, club hming aṭanga thlir chuan group of death tia sawi theih a ni. Nikum finalist Aizawl FC tan pawh semifinal luh a harsa ang.
Chutihrualin MPL11 aṭanga thlir chuan group B hi an ṭha zawk miah lo. Group A-a awm Chanmari FC, SYS FC leh Ramhlun Athletic te hi MPL11-ah a sang pali zingah an tel mek. Sihphir Venghlun pawh paruknaah awm mah se an chunga awm Mizoram Police nen an point hmuh zat a inang.
Mahse, group A-ah Bethlehem Vengthlang an awm a, Aizawl DFA hnuaia First Division club an nih miau avangin MPL club lakah chuan an ruh a no tura ngaih a ni.
SYS naupang zawk
SYS FC-in MPL an khelh hmasak berah result ṭha neih an duh a, hei vang hian I Day Football-ah team ṭha ber an chhawp chhuak dawn lo. Coach Lalmuankima leh player 14 te chu MPL atana inpuahchah turin Lungleiah an let a, I Day Football-ah player naupang zawk an inlan dawn.
Lunglei club hi coach Lalduhawma'n a ho a ngai a, MPL11-a inlan tam lote tan khelhna hun ṭha an pe dawn. SYS hi I Day Football-ah hian team nem ber an ni thei a, chutihrualin an fitness a ṭhat bakah an theihna an hriat chian avangin zuam ngawt a rem lo.
Chutihrualin SYS khingpui tur hi Chanmari FC an ni a, a enkawltu Lalsangzuala Hmar hi I Day Football 2023-a Chhinga Veng FC champion puitu a ni. Sanga hote erawhin nomawi chawi ngei an tum dawn a, SYS lakah zahngaihna an lantir lo ang.
Chanmari hian MPL11 match nga an khelh tawhah goal an la chhuah miah lo a, an record ṭha hi I Day Football-ah chhunzawm an tum ang. Tlarhmaah MS Dawngliana, Lalnunzama leh PC Rosangzuala te a nawm a, SYS lakah buaina an neih a rinawm loh.
Ramhlun hmaah BVT
Ramhlun Athletic leh BVT inkhel tur hi MPL dinhmun hriatna ṭha tak a ni thei ang. Covid-19 hnuah tawnhriat nei player chawl an tam bakah phai lama inkhel tur zin chhuak an tam avangin MPL a tlahniam hreta ngaih a ni.
Season liam taah pawh Aizawl DFA First Division-ah MPL-a khel tlak tur player an awma ngaih a ni a, kuminah a la ni zel em tih a hriat dawn. BVT hi season liam ta khan First Division league round-ah pakhatna an ni a, Ramhlun Athletic tan fiahna ṭha tak a ni ang.
Ramhlun Athletic hian MPL11-ah goal khung an harsat lo a, Serchhip tlangval Felix Lalruatsanga'n goal nga a khung tawh. Player dang paruk Flavius Lalruatkima, Benjamin Lalnunpuia, R. Lalchhantluanga, Lalawmpuia Hnamte, Richard Lalramnunpuia leh Michael ten goal khat ṭheuh an khung.
MPL11-ah Ramhlun hian goal 11 an khung tawh a, anmahni aia khung tam chu Aizawl FC (goal 14) chauh an awm. BVT lakah pawh Danny Lalduhawma hote hian attacking football an khelh ngei a rinawm a, chutihrualin First Division club hian an hlau bik lo ang.