Durand Cup khuallian Mizoram sports minister

Asia rama football inelna upa ber Durand Cup chu July 27, Inrinni aṭang khan khelh ṭan a ni a, kumin inelna hi khawpui pali Kolkata, Jamshedpur, Shillong leh Kokrajhar-ah neih a ni.

Kokrajhar, Assam bika inelna hi nimin khan SAI Stadium-ah hawnna neih a ni a, Mizoram sports minister Lalnghinglova Hmar chu khuallian a ni. Kokrajhar hian group E inkhel bakah quarterfinal a thleng dawn. Group E-ah hian ISL club pahnih NorthEast United leh Odisha bakah Bodoland leh BSF ten an awm.

Mizoram sports minister Lalnghinglova Hmar chuan, "Mizoramin zalenna kan neih rah kan seng a, football-ah hming kan chher. Mihring nuaih 11 vel lek awmna state ni mah ila, player ṭhahnem tak ISL leh I League-ah kan thawh thei a, FIFA World Cup qualifier hnuhnung berah khan India team-a player 22 aṭangin pali kan thawh thei a ni. Mizoram pawh India rama kan hlawhtlin theih chuan Bodoland tan theih lohna chhan tur awm lo," tiin khawtual mite a fuih.

Kokrajhar-a Durand Cup vawi 133-na hawnnaah hian Indian Armed Forces chuan van boruak sangah ennawm an pho chhuak a, khawtual mite chuan an hnam zia rang lan theihna lam chi hrang hrang a lantir bawk.