Olympic-ah Djokovic-a'n Nadal a hneh

Tennis player ropui bik pahnih Novak Djokovic leh Rafael Nadal te Paris Olympic 2024 singles match-ah an inhmachhawn a, inkhel hmuhnawm takah Serbian star Novak hi 6-1, 6-4 in a chak.

Paris Olympic tennis an khelhna hi French Open khelh ṭhinna hmun a ni a, clay court inelna liana vawi 14 champion tawh Nadal thawm a na. Mahse, Spanish star hi hun rei tak inhel mumal thei loa awm a nih avangin tun hma lam a phak thei tawh lo.

Grand Slam vawi 24 champion tawh Djokovic hian Nadal hnehin third round a inhlangkai a, a vawi khat nan Olympic gold medal hlawh chhuah ngei a tum ruh hle, infiamna khawmpui lian bikah phei chuan a hun hnuhnung a nih tawh avangin atan a pawimawh.

Kum 38 mi Djokovic chuan, "Inkhel bul ka ṭan fuhin ka thunun thei a, chutihrualin set hnihnaah fal taka hma ka hruai hnu pawh khan ka thlamuang chuang lo, a chhan chu Nadal hi helai hmunah chuan remchang siamsak chi a ni lo.

"Hun ṭha a hmu zeuh a nih chuan a tho chhuak leh mai ṭhin, set hnihna 4-0 a nih pawhin a beidawng lo tih a takin kan hmu," tiin a sawi a, a khelh danah a lungawi tih a sawi bakah sang zawk thlen a duh bawk.

Djokovic hian Olympic gold emaw silver medal emaw a la vaw chhuak ngai lo, Grand Slam vawi 22 champion tawh Nadal erawh Olympic champion a ni tawh thung a, kumin hi an pahnih tan hun hnuhnung a nih ngei a rinawm.

Beijing Olympic 2008 an neih ṭum khan Djokovic hian bronze medal a dawng a, China khawpuia inelna lianah hian Nadal a champion thung, major tournament zinga chhiar ni lo mah se Olympic hi chu an dahsang in an ngaihlu hle a ni.

Singles huangah chak lo mah se Nadal hi doubles-ah an la chak, a ṭanpui Carlos Alcaraz nen an la chak a, ram dang player tana hmachawn chakawm lo berte zinga mi an la nih ngei a rinawm a ni.

Mipa singles inkhel dangah Alcaraz a chak. Spanish tlangval hian Netherlands mi Tallon Griekspoor chu 6-1, 7-6 (3) a hnehin third round a inhlangkai a, ani pawh hian a vawi khat nan Olympic gold medal a beisei mek.

World number 3 Alcaraz hian kuminah French Open leh Wimbledon title a la tawh. Grass court inelna liana a champion dawn ṭum hian final-ah Djokovic a neh, tun inelna neih laiah pawh player pahnih hi en bik hlawh an ni chho dawn.

Paris Olympic mipa tennis-ah hian Andy Murray pawh a inlan - Britain tlangval hi doubles huangah a inlan a, tun inelna zawh rual hian tennis chawlhsan a tum tawh avangin match tin hu a tawpna a ni thei zel tawh tihna a ni.

A vanglaia world number 1 pawh ni tawh Murray hian Olympic gold medal vawi hnih a vaw chhuak tawh a, Grand Slam vawi thum la tawh bawkin player ropui dangte nen an vanglai inrual mah se a hlawhtling hle.