Perez chungah rinna an nghat chhunzawm

Red Bull thuneitute chuan season chawhnu lama an driver pakhat zawk Sergio Perez dinhmun tur an ngaihtuah a, thlak danglam loin a ngai rin chhunzawm an tum tih an sawi.

Perez hian kum 2021 aṭang khan Red Bull car hi a khalh ṭan a, tun hnaiah beisei a phak lo. Pathiannia tlan zawh tak Belgian Grand Prix-ah khan Perez hian pahnihna aṭangin bul ṭan mah se a tawpah pasarihna a ni phak hram.

April thla a tlan Chinese Grand Prix 2024 hnuah Perex hian pathumna china thlen a la nei leh lo, a chet fuh hleihtheih loh avangin amah ngei pawhin boruak dang tem a hreh lo niin a lang hman, tun hnai mai khan chhuah a hreh lo tih a sawi zauh.

Red Bull thupuangtu, a hming tarlan loh chuan an team principal Christian Horner thutlukna siam angin an driver Perez chu season chawhnu lamah pawh an hmang chhunzawm dawn tih a sawi.

Perez a chet fuh theih miau loh avangin Red Bull tan team champion nih loh mai pawh a hlauhawm, an driver ṭha zawk Max Verstappen chetṭhat ringawt chu team champion nih nan a tawk zo dawn lo niin a lang.

Red Bull hian team championship table-ah hma la hruai mah se, anmahni hnaih bertu McLaren nen an inkarah point 42 chauh a awm tawh, an dinhmun a him lo. Driver inelna lamah erawh Verstappen chuan point 78 ngawtin hma a hruai fal.

Car intlansiakna sang ber hi season chanve an hmang zo, intlansiak vawi 14 an hmachhawn tawh. Nipui chawlh an nei zuai dawn - August thla tawp hian season chawhnu lam bul ṭan nan Dutch Grand Prix an tlan leh ang.