David-a'n goal a khung nghal

East Bengal striker David Lalhlansanga chuan Kolkata club tana a match hnihnaah goal a khung nghal a, a goal khung hi goal ṭha bik a ni - David hian Calcutta Football League-ah East Bengal tana a match hmasa ber a lo khel tawh a, mahse, hetihlai hian training a la nei mumal hman lo.

Durand Cup-ah 'fit' zek zawkin David a inlan a, goal a khung nghal. East Bengal hian Indian Air Force chu 3-1 in an hneh a, David bakah hian striker thar tho Dimitrios Diamantakos leh Saul Crespo ten goal khat ve ve an khung a, Air Force-in Naorem Somananda Singh hmangin goal khung hmasa mah se a tlawm zawkah an ṭang zui.

Air Force tan hian Mizoram captain hlui Zico Zoremsanga chu bench aṭangin a lut a, lung a tileng hle - Zico captain-na hnuaiah hian Mizoram chuan kum 2014 khan Santosh Trophy an lo champion tawh.

Mohammedan SC aṭanga East Bengal pantu David chuan, "Vawi khat tal goal khung kha ka tum hrim hrim a, ka pet goal lawk thei lo zawk. Tunah chuan ka in fit ṭha leh tawh a, inkhelh pawh a nuam leh tawh khawp mai - ka club thar pawh nuam ka ti rih viau e," tiin Vanglaini a hrilh.