Kan indinthar mek - Liverpool CEO
Liverpool chief executive Billy Hogan chuan manager Jurgen Klopp chhuah hnuah Liverpool chuan insiamthar hnah an thawh mek thu a sawi a, Klopp-a chhuak chu Merseyside club tan intuaitharna hun ṭha a nih thu a sawi.
Jurgen Klopp-a'n kum kua zet Liverpool a enkawl hnuah, season hman zawh tak tawp rualin Reds a chhuahsan a, Liverpool player leh fans tam takin mittui nen an thlah.
German coach hian Liverpool tluchhe tawh chu dinthar lehin, nomawi pasarih zet a chawipui a, heng zingah hian an la chawi ngai loh Premier League nomawi a tel avangin ngaihhlut a hlawh hle - Champions League pawh sawi hmaih a thiang lo.
Klopp hian "Thathona ka nei tawh lo a ni," tiin Reds a chhuahsan tur thu hi January khan a puang tawh a, Liverpool hian an coach chhuah tur thu an hriat rualin indinthar hna an thawk ṭan nghal.
Tuarna pawh hlawkna
Klopp meuh chân chu Liverpool fans tam takin an ngai thiam lo a, Anfield-ah a theih chen chen cham se an duh. Mahse, club ṭantute mittui chu club neituten lawmna mittuia chan tir an tum a, "Tuarna pawh hlawkna" tih sa thei turin an indinthar mek.
Reds hian coach atan rei pawh rial loin Arne Slot chu an la lut a, pre-season tour-a an inkhelh dan aṭanga thlir chuan Merseyside club hian an khelh dan phung pawh an thlak dawn tih a chiang tawh.
Coach piah lamah, lang lo lama hnathawk ṭhinte pawh Liverpool hian an siksawi nual. Liverpool neitu Fenway Sports Group (FSG) te chuan an hnuaia thawk ṭhin tho Michael Edwards leh Julian Ward te chu an ko kir a, Liverpool indinthar lehna tura a ruh rel duang turin an ti.
Hogan chuan, "Klopp-a'n a chhuah tur thu a sawi kha chuan min nghawr ve dawt a, mahse, amah leh a chhungte tan thutlukna dik a siam, a tih theih a, club tan pawh a ṭha zawk. Klopp-a'n Reds a zawm khan, hmun duhawm zawka hlan kai a, chhuahsan kha a rilruk dan a ni a, a duh ang takin a ti a ni," a ti.
Hun lawmawm
Hogan chuan, "Klopp-a'n a chhuah tur thu a puan hma avangin club dinthar leh tura hmalakna kan lo duan lawk theih phah," a ti a, German coach hmalak dan a fak - Reds hian Bournemouth aṭangin sporting director Richard Hughes leh Benfica aṭangin technical director Pedro Marques an la lut bawk.
Hughes leh Marques te hian transfer bazar ngawr ngawr an buaipui dawn a, Slot an pui bawk ang - tuna a lan danah chuan hna an la thawk vak lo! A chhan maw? Reds hian tun nipuiah player lakluh an la nei tlat lo alawm!
Hetihlai hian Liverpool hi inrenchem taka sum hmang ṭhin an ni hrim hrim a, Hogan chuan Premier League-a club-te sum hman theih chin bithliahte chu an tan thil lawmawm a nih thu a sawi - hetihrual hian UEFA financial fair play regulation nena inzul deuh dan neih erawh a duh thu a sawi.
Liverpool hotupa chuan, "Kan zavaia hma kan sawn tlan theih a pawimawh. Khawvela league inelna hautak ber neitu kan ni a, hetiang a nih reng theih nan theihtawp kan chhuah a ngai," a ti a, sum ngah ngah dinchanna league ni lo se a duh.