Leipzig-in Olmo hralh tlawm tum lo

RB Leipzig chuan Barcelona, Manchester City leh Bayern Munich te hel lai, an player pawimawh Dani Olmo chu man tlawm taka hralh an tum lo - European club-te chu an player hi an duh a nih chuan an sum sen hreh lo turin an vau lawk!

Euro 2024-a Spain champion puitu Olmo hi Euro a khelh ṭhat avangin ngaihventu an pung sawt a, German club-a a contract-ah euro maktaduai 60-a leichhuah theihna dan awm mah se, top club ho an che muang hret a, a release clause hi a tawp tawh.

Chumi awmzia chu Olmo lei duh an awm a nih chuan RB Leipzig nen a man chungchangah an indawr thar a ngai dawn tihna a ni a, €60mtd aia tlem lo insen huam a ngai dawn niin a lang - RB Leipzig CEO Johann Plenge chuan an player chu tlawm taka hralh an tum loh thu a sawi.

Plenge chuan, "Dani hian ngaihventu a ngah a, kan player erawh a la ni reng. USA-a tour kan neih zawha club training kan neih leh hunah pawh kan player a la nih chhunzawm zel ka ring.

"Euro ṭha tak a hmang a, top club hoin an rim rawn hi zep tur pawh a awm lo. Transfer hi chu football-in a ken tel ve reng leh kan sumdawnna pakhat a ni a, chutihrual chuan football-in a ken tel ve pakhat mai a ni bawk. Chiang taka ka sawi duh chu kan player-te hi an phu tawk aia hniamin tumah kan hralh dawn lo," a ti!

RB Leipzig CEO chuan sawi chhunzawmin, "Olmo hralh ngei ngei tur hian pressure kan nei hran lo - club dinhmun ṭhat nan sum lakluhna pawh uluk takin kan duang ṭhin a, transfer-ah pawh chutiang chuan kan duang vek.

"Mahse, kan beisei anga transfer aṭanga sum kan hmu lo a, kan chhiarna zata an ngam loh avanga kan inhralh ta lo a nih pawhin, kawng danga sum lakluh dan kan dap mai ang," a ti.

La Masia chhuak Olmo hi Barcelona chuan an hnaih ber nia sawi a ni - Spain international hi a dangdai ve hrim hrim. Barca academy chhuahsanin Dinamo Zagreb a zawm teh daih a, February 2015 khan Croatian club tan a match hmasa ber khelin, regular taka a khelh ṭan chu 2017-18 season kha a ni.

January 2020 khan Bundesliga club RB Leipzig a zawm a, match 148-ah goal 29 khungin, assist vawi 34 a nei. Season hman zawh takah khan match 25 khela goal riat khungin, assist vawi nga a nei a, Euro 2024 khelh zawh takah khan top scorer zingah telin, team of the tournament-ah a lang phak bawk.