Reds-in Van den Berg dawrna hnar

Liverpool defender Sepp van den Berg chu Eredivisie club PSV Eindhoven chuan lei tumin Reds dawr mah se, Merseyside club hian Dutch club aṭanga dawrna an hmuh zat hi tlem an tih avangin an lo hnar.

Kum 22 mi Van den Berg man zatah hian Dutch club hian pound maktaduai 8.4 vel an theh chhuak a, hetihlai hian Reds hian an player manah hian £20mtd bawr vel tal hmuh an inbeisei a ni.

Dutch centre back, right back-ah pawh chhawr theih Van den Berg hian an ram club PEC Zwolle aṭanga a professional zinkawng zawh ṭanin, June 2019 khan Reds hi £1.3mtd-in a zawm.

Mahse, Liverpool-ah khelhna hmun a chang phak lo a, Championship club Preston North End, Bundesliga club Schalke 04 leh Mainz 05-ah te loan-in a khel a, season hmasa khan Mainz tan match 35 khelin goal thum a khung.

Mainz hian Bundesliga-a inhamtanpuitu defender hi a ngheta lakluh duh mah se, Liverpool-in an chhiar to hret avangin an lei ngam lo a, tunah pawh PSV-in dawr mah se, Reds hian an lo hnar nghal.

Van den Berg hi USA-a pre-season tour nei mek Liverpool squad-ah a tel a, Real Betis laka 1-0 a an chak ṭumin inkhel bul a ṭan. Manager thar Arne Slot hnuaiah Liverpool hian khelh dan phung thar an pholang mek a, August 1, Ningani zing dar 5:00-ah Arsenal nen friendly match an khel leh ang.

Liverpool leh Arsenal intawnna tur hmun hi Lincoln Financial Field a ni a, he khelmualah hian mipui 67,594 lengin, ticket an hralh zo vek tawh.