Eriksen-a'n a hma hun a sawi

Manchester United midfielder Christian Eriksen chuan Old Trafford chhuahsan tur anga sawi awm chu a pha a, Denmark international hian Manchester-ah a hlim thu a sawi.

Kum 32 mi Eriksen hian Dutch club ṭha Ajax-ah a hming a chher hnuin, kum 2013 khan Tottenham Hotspur chu pound maktaduai 13-in a pan a, London club-ah hian a hming a chher lehzual.

January 2020 khan Inter Milan a zawm a, beisei erawh a phak lo. Inter tana a khelh lai, Euro 2020-ah Denmark tana a inlan laiin lungphu ṭha lo vangin a tlu a, a hnuah enkawl dam ni mah se, a taksaah implantable cardioverter-defibrillator (ICD) phum a nih tawh avangin Serie A-ah a khelh chhunzawm thei lo.

Inter hian a contract titawp zuiin, Premier League club tenau Brentford a zawm - a hming a chher leh hnuah, July 2022 khan United hian kum thum chhung atan an la lut a, mahse, beisei erawh a phak chhunzawm lo.

Eriksen hian season hman zawh takah khan league match 22 chiah khelin, match 12-ah chiah bul a ṭan a, inelna hrang hrangah match 28 khela goal khat khungin, assist vawi thum a nei.

Mahse, Eriksen hian United chhuahsan tumna erawh a nei lo. Kum 33 mi midfielder chuan, "Kum khat cham turin contract ka la nei a, kei chuan United player ka ni tih ka hria. Min mamawh tawh loh thu hrilh ka ni lo a, contract thar zawrh pawh ka ni chuang lo.

"Chumi thlirna aṭanga thlir chuan United-ah hian kum khat ka la nei a, keipawhin nuam ka la ti rih hle. Ka chhungte pawhin Manchester-a chen hi nuam an ti a, United hi club nuam tak a ni bawk," a ti.

Eriksen chuan a inkhelh tam loh chungchang pawh sawi langin, "Inkhelh tamte chu duhthusam a ni a, chutihrual chuan team tana kan thawhhlawk dan thlir tel a ṭul - ka thawh ṭha thawkhatin kei chuan ka hria. Kei chuan ka awmna tur taka awmah ka inngai a ni," a ti a, chhuah a tum hmel loh hle.

United hi USA-ah pre-season tour neiin an zin mek a, Arsenal chu 2-1 in an hneh lo tawh. August 1, Ningani zing dar 7:30-ah Real Betis hmachhawnin an inlan zui leh ang.