Chiesa agent London-ah a kal

Juventus winger Federico Chiesa agent Fali Ramadani chu London lam panin a thlawk chhuak niin khawthlang media-te chuan an tarlang a, Italy international aiawh hian amah duhtu Chelsea leh Tottenham Hotspur thuneitute indawrna a neihpui dawn niin a lang.

Kum 26 mi Chiesa hian Juventus-ah nakkum thleng bak contract a nei tawh lo a, hei vang hian Italian club hian man a neih theih laia hralh an pawi ti lo nia sawi a ni - Manchester United hming pawh lam rik zingah a tel.

Chiesa hi Juve coach thar Thiago Motta ruahmannaah a tel lo a, a tan chhuah mai hi a finthlak. Season hman zawh takah khan Chiesa hian Juve tan inelna hrang hrangah match 37 khelin goal 10 a khung a, assist vawi thum a nei.

Fiorentina aṭanga a hming chherin, match 153-ah goal 34 khungin, assist vawi 26 a nei a, Juve tan season li a khel hman. October 2020 khan Juve hi season hnih atan loan-in a zawm phawt a, kum 2022-ah a nghetin a zawm.

Juve-ah season li hun a hman chhungin inelna hrang hrangah match 131 a khelhsak a, goal 32 khungin, assist vawi 23 a nei a, Coppa Italia nomawi pahnih leh Supercoppa Italiana nomawi a chawipui - club chhuahsan tura a inruahman mek avangin Germany-a pre-season tour-ah pawh a zin ve lo a ni.