Premier League-in 'Project Big Picture' a pawm lo
English football nghawr nghingtu 'Project Big Picture' chu Premier League club-ten an inhmuhkhawm hnuah an pawm duh lo a, he thutlukna hi English top flight club 20 aiawh inhmukhawmin an siam.
Project Big Picture hi Liverpool leh Manchester United-in an duan a ni a, he ruahmanna langsar tak pakhat chu Premier League a club 20 awm mek chu club 18 a tihhniam chu a ni.
Mahse, English club lian pahnih beisei angin club dangin an thlawp lo a, Premier League club aiawh inhmukhawmte chuan English football-in sum lama hma a sawn theih nan mumal taka ruahmanna siama thawhho an thlang zawk.
Nilainia inhmuhkhawmah hian Covid-19 vanga sum lama talbuai mek League One leh League Two club-te puih nana pound maktaduai 50 thehchhuah chu an pawm bawk a, Premier League chuan Championship club-te suma puihna tur chungchang chu an ngaihtuah tur thu an sawi bawk.
Premier League chuan, "English football-in sum leh thil danga hma a sawn theih nan Premier League club 20-te chuan lungrual taka thawh ho kan remti a ni.
"Engkim lang tlang leh chiang taka hmuh theih turin club-te chu lungrual takin an thawkho ang a, inelna kalpui dan, calendar, insawrkarna leh sum dinhmun siamṭhatna hna te chu an thawk dawn a ni.
"He ruahmanna hian FA aṭangin thlawpna ṭha tak a hmu a, football a inhnamhnawih zawng zawng, fans, sorkar leh EFL chenin he ruahmanna hi an thlawp a ni," an ti.
Project Big Picture Ruahmanna (a tlang ta lo):
• Sum harsatna tawk mek EFL club-te chu pound maktaduai 250 pek tur an ni.
• Premier League a awm rei tawh club pakua tan special voting rights a awm ang a, Premier League a thil thlak danglam turin anni zinga club paruk remtih tlanna hi a tawk ang.
• Premier League club 20 chu 18-ah tihhniam tur a ni.
• FA-in sum an hlohte puihna turin pound maktaduai 100 pek tur a ni.
• Premier League sum lakluh 8.5% chu league inenkawlna leh FA hnuaia ruahmanna ṭha zawkte atan hman tur a ni.
• Chhiah pek hmaa Premier League sum lakluh 6% chu English top four division a stadium thuam ṭhat nana hman tur a ni a, seat pakhat siam nana £100 hman zel tur anga chhut tur a ni.
• Premier League-in television aṭanga a sum hmuhte sem danah ruahmanna thar siam a ni ang.
• League Cup leh Community Shield chu tihtawp tur a ni.
• Championship, League One leh League Two-in club 24 ṭheuh an nei dawn a, professional club 92 ṭhin chu 90 a ni dawn tihna a ni.
• Premier League club 18 aṭangin a hnuai lam pahnih chu Championship a tla thla chiang tur an ni a, mahse 16-na chuan Championship club pathum nen playoff tournament an hmachhawn ang.
• Championship table a pakhatna leh pahnihna chu automatic a Premier League khel tura tling tur an ni a, pathumna, palina leh pangana ten Premier League 16-na nen playoff an khel ang.
• Premier League leh FA thuneihna ni loa Women's Professional league a hranpaa kalpui.
• UEFA dan zulzuiin Financial fair play regulations kalpui a ni ang a, Premier League executive ten club sum hman dan zalen takin an en thei ang.
• Fan-te tan khualmuala inkhel en man chu £20 ni se, khualmuala fan-te zinna puih ni se, fan-te ṭhutna him zawkna tur ngaihtuah a, khualmuala inkhel reng rengah away fans tan 8% seat a tlem berah hauh tur.
• Pre-season friendly tam zawk khelh a nih theih nan August thla tawp lamah Premier League khelh ṭan tur.
• Loan a player chhuahtir danah dan thar siam a ni ang.