PSG-in Joshua Kimmich an duh

Bayern Munich player langsar Joshua Kimmich chu Paris Saint-Germain-in lakluh tumin an hel a, German club hi an dawr tawh. Germany international hi French club-ah a kal lo lo ang tih a sawi theih loh - Kimmich hian ram pawna khelh a châk.

Kum 29 mi Kimmich hian RB Leipzig aṭanga a professional zinkawng zawh ṭanin, season hnih a khelh hnuah kum 2015 khan Bayern hi a pan - German club tan champion nomawi chawi theih zawng zawng a chawi kim tawh a, chona thar hmachhawn a duh hi a awm lo hran lo.

Germany tan vawi 91 inlana goal ruk khungtu Kimmich hian Bayern tan inelna hrang hrangah match 390 khel tawhin, goal 42 ngawt a khung a, kum 2022 khan ram pawna khelh ve a châk thu a lo sawi tawh.

PSG hian right back leh defensive midfield-a khel thei Kimmich bakah hian, kum 19 mi Benfica midfielder Joao Neves nen pawh sawizawm an ni a, PSV Eindhoven Midfielder Jerdy Schouten pawh an lam ri.

Kimmich bik hi Barcelona nen pawh sawizawm a ni hman a, mahse, Catalan club hian khaw dang an hawi leh ta zawk niin a lang. German midfielder hian season hman zawh takah khan Bayern tan inelna hrang hrangah match 43 khelin goal hnih a khung a, assist vawi 10 a nei.