Alvarez-a'n chhuah a hnial lo

Manchester City forward, Argentina tana Olympic khela thang mek Julian Alvarez chuan nipui transfer-a chhuah a hnial loh thu a sawi chhuak a, Atletico Madrid chuan uluk takin Argentine striker hi an thlithlai mek.

Kum 24 mi forward hian season hman zawh takah khan City tan match 54 khelin goal 19 a khung a, assist vawi 13 a nei bawk. Mahse, Alvarez hi match pawimawha chhalah a inlan phak meuh lo a, Erling Haaland a awm miau avangin a tan a harsa.

Alvarez chuan, "Ka hma hun tur ngaihtuahin ka chawl lo a ni ber mai. Season hman zawh takah khan team tana minute khel tam ber ka ni a, mahse, zep tur a awm lo - match pawimawha inthlan loh leh ṭhin chu hrehawm tak a ni.

"Thutlukna ka la siam thuai dawn a, Olympic hi zo phawt se, uluk takin ka hma hun tur ka ngaihtuah ang," a ti a, Pep Guardiola hnuaia a khelh reng tur thu a sawi ngam lo.

Alvarez hian Argentina tan World Cup nomawi chawi tawhin, Copa America-ah a champion pui leh a, world champion striker ni chunga club tana hmun pawimawh chan phak loh hi a tlawm thlak ang.