Shakhtar-in Bayern an chelh

Ukraine-ah German champion Bayern Munich an zin a, Arena Lviv-ah Shakhtar Donetsk nen goal awm loin an inhnehtawk. Champions League Round of 16 second leg hi March 11 zanah Allianz Arena-ah khelh leh tur a ni.

Thawhlehni zan inkhelah Spanish mid­fielder Xabi Alonso-a'n Champions League-ah a match 100-na a khel a, hnawhchhuah a ni.

Bayern midfielder hian first half-ah Alex Teixeira laka a foul avangin yellow card a hmu tawh a, minute 65-naah Taison lakah a foul leh avangin red card a hmu a, an hnawh chhuak ta a ni.

Pep-a record

Spanish manager Pep Guardiola-a'n Bar­celona a enkawl lai aṭang tawhin Champions League knockout stage khualmuala khelhah record ṭha tak a nei lo, vawi 16 team a kaihruai tawhah vawi li chiah a la chak pui thei a ni.

Ukraine champion hmaah Bayern-in bul an ṭan ṭha a, minute 10 chhung lekin goal thum khung theihna an nei nghal. Goal khungna chance ṭha ber neitu Bastian Schweinsteiger-a'n a duh tui luatah goal a khung lo.

Minute 10 hnuah Bayern-in ball chan tam chu thupui berah an nei a, an goal bawh a nat tawk loh avangin first half-a goal a lut lo hi a mak lo.

Second half-ah Bayern-in Shakhtar penalty area an thleng thei meuh lo a, Arjen Robben chu Bayern player hlauawm ber a ni.

Minute 75-naah khel ṭha lo Mario Gotze aiah Robert Lewandowski luh tir a ni a, player 10- a khel an nih tawh tlat avangin a danglam phah lo.

Hun tawp thlengin goal a lut lo a, Bayern hi kartawpa Hamburg 8-0 a hnehtu tih an hriat loh.

Fak phu Shakhtar

Shakhtar manager Mircea Lucescu game plan a hlawhtling a, a tir minute 10 an talbuai bak an chesual chhunzawm lo.

Shakhtar player-te'n concentration an hloh lo a, Taison a thawkrim a, Bayern tan Brazilian stiker hi a hnawksak a, first half-ah goal a khung teuh hle.

Ukrainian club lamin foul an ngah a, German player-te an insum zo lo a, an theihna ang an pho chhuak thei lo.

Shakhtar hian an muala goal an chhuah loh avangin Allianz Arena-a goal an khung theih chuan draw ringawt pawhin quarterfinal an lut thei dawn a ni.

Engnge an sawi?

Shakhtar manager Mircea Lucescu chuan, "Kan ngaih pawimawh hmasak ber chu tlawm loh a ni. A dawtah chuan 2nd leg-a beiseina a neih a ni. Kan result aṭang chuan beiseina chu kan nei chiang a ni," tiin an hlawhtlin thu a sawi.

Lucescu chuan sawi chhunzawmin, "Player 10-a an khelh hnu khan chak tumin kan khel tawk lo a, kha erawh kha chu a ui hnuhnawh khawp mai," a ti.

Bayern boss chuan, "Goal khung theihna tur chance ṭha kan nei a, Shakh­tar khan an nei ve lo. Player 10-in hun rei tak kan khel a, chuvangin khelh a harsa a ni. Inkhel thunun mah ila goal chance kan ngah tawk lo. Kan supporter-te ṭanpuina nen second leg chu a danglam tawh ang, hlauh tur a awmin ka hre lo," tiin a sawi.