Kan thawhrim rah - Ralph Krueger

Southampton in rin phak bak bakin season hmasa kha an khel ṭha a, Premier League-ah point 56 hmuin pariatna dinhmun an hauh a, Manchester United leh Tottenham Hotspurs-te nen an inel tawk hle.

Tun season ṭan dawnah an player ṭha tam tak Dejan Lovren, Rickie Lambert, Adam Lallana, Calum Chambers, Luke Shaw ten club lian zawk an pan san a, manager Mauricio Pochettino-a'n Spurs a zawm san bawk.

Argentine manager Pochettino thlak turin kum 51-a upa Ronald Koeman an lalut a, Dutch manager Koeman enkawlna hnuaiah English club liante an el pha ve nghal.

League game 25 khelh tawhah point 46 hmuin Champoins League khel thei dinhmunah an la ding.

Saints chairman Ralph Krueger chuan, "Kan team hlawhtlinna hi kan vanneih vang a ni ngawt bik lo a, kan thawhrimna leh kan rilru puthmang a dik vang zawk a ni. Kan kalphung a fuh rih em em a, club thuneitu leh thawktu zawng zawngte, player leh manager-te'n kan club hmasawnna turin nitinin theihtawp an chhuah ṭhin. He dinhmun thleng tur hian tha leh zung tam tak kan seng a ni. Hei aia hmasawn lehzual turin kan theih tawpin kan bei zel ang, " tiin an thawhrim vanga cheṭha an nih thu a sawi.