Hmelma kumhlun India leh Pakistan

Pathianni zingah cricket khawvelin a hmuh chak a hmu a, India leh Pakistan a vawi ruk nan an inhmachhawn a, run 76 in India an chak. Pakistan-in Cricket World Cup-ah India an la hneh lo chhunzawm zel a, Pakistan-ah chuan big screen a entu Pakistan fans ṭhenkhat thinrimin inkhelh zawhah big screen an vawm chhia tihte chu thawm ri ring pawl a ni.

India leh Pakistan inkhel hi a hmunah mi 4,7000 velin an en a, ticket hi zawrh chhuah a nih aṭanga minute 20 chhungin hralh zawh vek a ni! Khawvel pumpuia TV a inkhel entu zat hi tluklehdingawn 1.5 nia chhut a ni a, report ṭhenkhat chuan tluklehdingawn 2.5 tling hial angin an report. Tunhnaia khawvela sports event thlirtu ngah ber nia chhut a ni. A hnaih bertu 2014 FIFA World Cup a Germany leh Argentina final kha mi tluklehdingawn khat velin an en nia chhut a ni bawk.

India leh Pakistan inkhel en tur hian khawvel hmun hrang hrang aṭangin mi 60,000 vel Adelaide khawpuiah an thlawk lut nia chhut a ni a, khawpuia hotel khum zawng zawng zat hi 26,000 chauh a nih avangin Airport a riak an tam hle. India leh Pakistan aṭang ringawta kal hi mi 10,000 vel niin South Australia sorkar official-te chuan an sawi a, UK, Singapore leh USA aṭangin kal an tam hle bawk.

South Australia's strategic advisor on India, Brian Hayes chuan, "India leh Pakistan in cricket ODI an khel a nih chuan khawvela sport event lian ber a ni nghal zel a ni," a ti.

Adelaide Airport spokesman Brenton Cox chuan, "Adelaide Airport terminal chu a vawikhat nan zankhua a tan kan hawng tawp mai a ni," a ti bawk.