FA Cup Quarterfinal-ah Manchester United Vs Arsenal
Champion lai Arsenal-in Old Trafford-ah Manchester Untied an hmachhawn dawn - FA Cup quarterfinal inkhel tur zinga ngaihven hlawh ber a ni.
FA Cup-ah team pariat chiah an awm tawh a, quarterfinal hi March 7-8 a khelh tur a ni. Semifinal aṭangin Wembley Stadium-ah khelh a ni ang.
Club inhal
Manchester United leh Arsenal-te hi club inhal an ni a, League-a an dinhmun aṭanga chhutin FA Cup team la dam zinga a ṭha pahnih an ni.
Sir Alex Ferguson hun a tawp tawh a, Premier League manager ropui Sir Alex leh Arsene Wenger-te inelna a ni tawh lo a. Captain langsar Roy Keane leh Patrick Viera te hun a liam tawh. Chutichung chuan club pahnih inkhel tur hian ngaihven a hlawh hle.
Arsenal leh United hi vawi 209 a inkhel tawh a, Manchester United hian ṭum 88 hnehna an chang a, vawi 48 an inhnehtawk. Arsenal hian vawi 73 hnehna an chang tawh a, an record aṭang chuan inchhuang tur zawk an awm lo.
Old Trafford-ah vawi 100 an inkhelh tawh a Manchester United vawi 59 an chak a, vawi 25 an inhnehtawk - United an chungnung zawk.
Preston lama United tana goal khungtu Marouane Fellaini chuan, "Inkhel en tlak tak leh ropui tak a ni ngie ang, Arsenal leh United inkhel hi chu a nep ngai ngai lo hrim hrim," tiin a sawi.
2004-05 FA Cup final-ah Arsenal-in penalty hmangin United an hneh a, hemi ṭum hian final hi Cardiff-ah khelh a ni.
Inkhel tur dang
Liverpool-in Anfield-ah Blackburn an mikhual dawn a, Steven Gerrard-a'n Wembley kalkawng awlsam zawk a zawh dawn tihna a ni. Blackburn hi Championship club niin Premier League club Swansea leh Stoke hnehtu an ni.
League One giant killer Bradford City-in Reading an hmachhawn dawn. Bradford hian 1976 hnua a vawi khatna atan quarterfinal an thleng a, semifinal luhna chance an nei ṭha hle. Bradford hi Chelsea leh Sunderland hnehtu an ni.
Premier League club pahnih Aston Villa leh West Brom te Villa Park-ah an inhmachhawn dawn bawk. Villa manager thar Tim Sherwood tan FA Cup-a result ṭha neih hi hming chherna awlsam a ni ngei ang.
FA Cup quarterfinal
Aston Villa v West Brom
Bradford City v Reading
Liverpool v Blackburn
Man United v Arsenal