Ronaldo a ṭha tulh tulh - Ancelotti
Real Madrid coach Carlo Ancelotti chuan a player pawimawh Cristiano Ronaldo chu tunhma aiin a ṭhat tulh tulh thu a sawi.
Portugal captain hian Real Madrid tan tun season-ah goal 33 zet a khung tawh a, La Liga-ah goal 28 khung tawhin top scorer a ni mek. Barcelona super star Lionel Messi aiin goal hnihin a khung tam zawk..
Real game hnuhnung pathumah Ronaldo hian goal a khung lo a, hei vang hian mi ṭhenkhatin a inthlahdah vang leh hma a sawn lo sawisel mah se Real boss Ancelotti chuan a pawmpui ve lo a, a player hi a ṭan tlat.
Real Boss Ancelotti chuan, "Deportivo La Coruna nen kan inkhelh ṭum pawh khan a khel ṭha em em a, a chakin a fing a, a theihna hi a sang em em a ni. Goal chu a khung zel ang. Kan inkhelh leh hmasak berah chuan goal a khung leh ngei tawh ka ringz," tiin a player chungchang a sawi.