Parc des Princes-ah chak zawk an awm lo

Paris St Germain-in Champions League Last 16 first leg-ah Premier League hmahruaitu Chelsea an mikhual a, 1-1 in an inhnehtawk.

Thawhlehni zan inkhelhah Chelsea-in defender Branislav Ivanovic goal hmangin first half-ah hma an hruai a, Uruguayan forward Edison Cavani hamngin PSG-in second half-ah an siphurh an sut. French champion hian nawr chhunzawm mah se a tawpah Chelsea an him hram.

Thlirletna

Season liam ta khan Chelsea-in semifinal thleng turin PSG hi away goal rule hmangin an hneh a, amaherawhchu first leg-ah PSG lakah 1-3 in an tlawm.

Tun ṭumah hian Parc des Princes-ah bawk an inkhel hmasa a, Chelsea-in away goal hlu tak an neiin March 11 zanah Stamford Bridge-ah second leg khelh leh tur a ni.

Tunge inlan?

Nipui transfer-ah Brazilian defender David Luiz-a'n Chelsea chhuahsanin PSG a zawm a, Luiz hi defensive midfield-ah awmin a club hlui an hmachhawn ṭum hian a khel ṭha.

Jose Mourinho hnuaiah Luiz hi midfield-ah a khel fo a, French champion tan erawh a vawi khat khelhna a ni. Luiz hi midfield-a a awm zarah Blaise Matuidi-a'n tlar hma a pui tam theih phah a; Chelsea-in keeper-ah Petr Cech aiah Thibaut Courtois an hmang bawk.

Ivanovic bawk

PSG-in bul an ṭan ṭha a, French midfielder Matuidi leh Swedish forward Zlatan Ibrahimovic goal khung tur Courtois-a'n ṭha takin a dang a; Belgian keeper hian Edison Cavani tauh goal tur a dang bawk.

Mualneitu cheṭha zawm mah se goal khung hmasa zawk erawh Chelsea an ni. Minute 36-naah Thiago Silva-a'n a lu hmanga a clear ṭhat tawk loh avangin Ivano­vic-a'n goal hmahruai a tauh lut. Goal luh theih nan hian defender vek an inrawl, John Terry cross chu a kawppui Gary Cahill-a'n khawih kawiin Ivanovic-a'n tun season-a a goal ngana a khung.

2013 Europa League final-ah khan Serbia defender hian Chelsea chakna goal a lo khung tawh bawk.

PSG hun

Second half-ah PSG an che ṭha chhunzawm a, minute 54-naah an hun a thleng a, Cavani-a'n hmangin goal an khung. Maxwell pass chu Matuidi-a'n ṭha taka cross-in Cavani-a'n Chelsea defender Terry leh Cahill te kar aṭangin a tauh lut.

Goal khat lut hian supporter-te phurna a pe a, field chhungah PSG an chungnung lehzual bawk. PSG chhuanvawr Ibrahimovic goal khung tur chu Courtois bawkin a lo dal a, Ezequiel Lavezzi freekick Luiz-a tauh pawh Belgian keeper hian a dang ṭha hle.

Goal khungtu Cavani-a'n goal hnihna khung theihna tur nei mah se goal zawnah pet lo a, hun tawp hma hreta Ibrahimovic tauh ṭha tak chu keeper Courtois-a'n dang lehin Chelsea a chhanhim.

Eng nge an sawi?

Chelsea boss Jose Mourinho chuan, "Tunah chuan vawi hnih inkhelh tur kha vawi khat chauh a ni tawh dawn a, kan inkhelh hmabak hi kan khelmuala khelh tur ni. Stamford Brige-ah record ṭha tak kan nei nachungin kan chungnung zawkna hi a tam lo hle," a ti. Chelsea hian FA Cup fourth round-a Bradford an hneh loh bak kha chu tun season-ah an khelmualah an la tlawm lo.

Portuguese boss Mourinho chuan sawi chhunzawmin, "Team ṭha tak kan tum a, player ṭha tak kan nei a, chak zawk an awm lo. Kan keeper khelh ṭhat dan thlirin a vannei zawk chu kan ni a, kan khelh dan erawh a ṭha thawkhat viauin ka hria" tiin an khelh dana a lungawi thu a sawi.

PSG head coach Laurent Blanc chuan, "Ka team khelh danah ka lungawi. Amaherawhchu goal kan chhuah avangin result duhthusam erawh a ni lo. Season hlui ai khan kan khel ṭha zawk a, chutihrualin 3-1 a chak kha ka duh zawk. Result aṭanga thlir chuan kan dinhmun a ṭha lo zawk," a ti.

French manager chuan sawi chhunzawmin, "Chelsea hian an khelmualah chance an nei ṭha zawk. Counter attack-a an ṭhat avangin pawng paw nawr chi an ni dawn lo," tiin a sawi a. Blanc hian Chelsea keeper Courtois a fak bawk.