MSL zaninah ṭan a ni dawn ta

Mizoram Basketball chanchina sum tamna ber leh mipui nghahhlelh Samsung 3:16 Plan Solution Mizoram Super Lea­gue chu zaninah khelh ṭan a ni dawn ta.

Hawla Indoor Stadium-ah Mission Veng Vikings Basketball Club leh Zarkawt Serpents te'n MSL match hmasa ber hi an khel ang a, zan dar 8:00-ah khelh ṭan a ni ang.

Zarkawt Serpents an zam lo

MBBA 1st division tournament hnu­hnung bera pahnihna Zarkawt Serpents hi mipui hmuh chak team an ni.

Serpents hian an player zingah han ṭha fal em em sawi tur nei lo ma hse, an inkhairualna tak hi an chakna hnar a nih theih thu an President TB Lalsiamliana chuan a sawi. Masiama chuan, "Players han che ṭha fal tur bik emaw kan nei hran lo a, an vai hian che ṭha tura beisei vek an ni. An dinhmun a in ang tlang a, hei tak hi kan tan chuan chakna tur a ni," a ti.

Masiama chuan Mission Veng Vikings an tum tur thlirlawkin, "Kan huphurh hran lo a, inkhelh hi kan châk tawh zawk a ni. Kan dinhmun tur hriat nan pawh inkhelh hrim hrim hi chu a châkawm tawh khawp mai," tiin a phur tawh hle.

Zarkawt Serpents hian practice an bei ngawrh hle a, zing tin leh tlai tin an practice avangin an player-te fitness hi an tan chuan an hmachhuan ber tur a ni.

Zarkawt khawtlang an phur a, Zarkawt Serpents Fans Club te hial an din. Hetiang taka khawtlang mipui an phur avang hian Zarkawt Serpents hian fans an nei ngah a nih pawhin mak ti suh ang che.

Mission Veng an phur

Mizoram basketball club hlun pawl Mission Veng Vikings hi Champion inring ngam khawpa 'inringtawk' chunga MSL hmachhawn tur an ni a, champion tur khawpin an ṭha em tih hi hmuh chakawm chu a ni.

An player ṭangkai Tuikhuahtlang tlangval K.Lalthazuala chu practice naah a inhliam vangin Serpents an hmachhawn hunah a khelh theih a rinawm loh a, amaherawhchu Tui­khuahtlang tlangval tho Lalrina Renthlei leh Model veng tlangval Moses Zoremmawia te an la neih avangin an zam lo ang.

Vikings hruaitu Lahruaitluanga chuan, "Zarkawt Serpents hi team ṭha tak an ni a, zuam ngawt chi an ni lo ang. Mahse, kan inbuatsaih dan enin hneh thei turah kan inngai," a ti a, Serpents ho chu an hneh ngei a in ring.

Mission Veng Vikings hi veng mipuin an phurpui a, vengchhung NGO aṭangin ṭawiawmna an hmu ṭha viau bawk. Zanina committee nei tura lo inruahman lawk Mission Venga YMA Branch pahnih North Branch leh South Branch te chuan Vikings inkhelh dawn vang hian meeting hun an sawn hial. Local council chuan a duh apiang tana kalna turin Bus an hire dawn bawk.

Fan-te tana hriattur

Gate chhungah mipui tan Parking a awm thei dawn lo. Inelna buatsaihtu, team motor leh mi pawimawh chinte chauhin parking-ah motor an dah thei ang.

Ticket chungchang

Gate-ah ticket lei tur a awm ang a, ticket man hi Rs 30/- leh Courtside Ticket Rs. 100/- a ni ang. Gate chhunga lut tawh tan chhuah phal a ni tawh dawn lova, an chhuak a nih pawhin Ticket a thara an lei zel a ngai ang. Hei hi Security chungchangah him zawka ngaih vang a ni. Ei leh In duh tan Gate chhungah a zawrhna hmun bik siam a ni ang.

ROUND 1 FIXTURES

February 19, Ningani

8:00 PM Mission Veng Vikings Vs Zarkawt Serpents

February 20, Zirtawpni

4:00 PM Tuikual South Vs Khatla TBL

8:00 PM Zarkawt BCA Vs Chaltlang Ryders

* Fixture chhunzawmna hi MSL Board-in a tichhuak leh ang.