Crystal Palace-in pawi-khawihtu hrem an duh

February 11-a English Premier League inkhelah Crystal Palace fan chuan Newcastle captain Fabricio Coloccini chu pawisa thir (coin) in a vawm. Inrinni zana Liverpool nen FA Cup fifth round an khel ṭum pawhin fan ten field chhungah thil an vawm lut leh bawk..

He thil thleng hi Crystal Palace thuneitute chuan chhui chian nghal an tum a, pawi khawhtu hi man chhuah a, hrem ngei an tum.

Selhurst Park-a inkhelah hian Newcastle lamin minute 42-naah Papiss Cisse hmangin goal an khung a, Newcastle lamin an goal thun an lawm laia field chhungah Crystal Palace fan ten pawisa thir an vawm luh chuan Newcastle captain Coloccini a fuh a ni.

Crystal Palace club thuneitu te chuan thuchhuah siamin, "Kan game hnuhnung pahniha thil thleng hi kan duh lo tak zet a ni. Kan theih tawpin kan chhui chiang mek a, kan man chhuak a nih chuan kan hrem ngei ang. Mi awm ṭha duh lo ṭhenkhat te avangin club hi a mualpho ve thei a hei hi kan duh lo hle a ni. Pawi khawihtu chu tupawh lo ni se Selhurst Park-ah hian a lo kal ve a rem tawh lo ang. Season ticket neitu pawh lo ni se a ticket te kan tih tawp sak dawn a ni. Mipui kan him tlan zawk theih nan club-in Body Camera (Police hman ṭhin) kan nei tawh a. Hemi bakah hian stadium-ah CCTV kan dah belh bawk ang," tiin thuchhuah an siam.