Vannei takin United an chak zel

FA Cup fifth round-ah Manchester United an vannei. Si an phurh hnuin goal thum an khung a, 3-1 in League One club Preston North End an hneh.

Preston khelmual Deep­dale-ah United-in an player neih ṭhat ber ber an thawhchhuahpui chungin first half-ah goal an khung thei lo a, goal awm lo in chawlhlawk an hmang. United hian goal an khung lo mai a ni lo a, first hlaf-ah hian goal khung turin Preston goal lamah 'shot' an nei lo hrim hrim. An tumpui Preston zawk hian vawi hnih United lamah an pet thung a, inkhel hmuh-nawm tak a ni hran lo.

United-in an goal khung theih loh an tuar a, second half ṭan aṭanga minute hnihnaah Preston defender Scott Laird chuan an hmahruaina goal a khung a, United an hawihai.

United lamin theih tawp chhuahin an nawr a, thla thum chhunga a vawi thumna atana starting eleven chang Ander Herrera chuan minute 65-naah an si phurh sutna goal a khung. United an phur sawt a, minute 72 naah Marouane Fellaini chuan United hmahruaina goal a khung a, 2-1 a ni.

United lamin inkhel an thunun tawlh tawlh a, minute 88 naah tunhnaia midfield a khel ṭhin Wayne Rooney chuan sawisel hlawh takin penalty a hlawhchhuak a, a penalty hlawhchhuah hi Rooney hian petin kum 2015-a a vawikhatna atan goal a khung. Manchester United in Preston 3-1 a hnehin FA cup quarter final an lut.

Eng nge an sawi?

Preston boss Simon Grayson chuan, "Chance ṭha tak insiam chungin kan chak zo lo a, kan khel ṭha hle in ka hria. Ka player te khelh danah ka lawm a ni," a ti

Rooney penalty chung­chang zawhna chhangin Grayson chuan, "Penalty a ni lo ka ti lo a, mahse kan keeper nen khan an intawk fuh lo. Thorsten Stuckmann nen an intawh dawn khan a lo inveng a, a tlu palh ni maiin ka hria, dive chu a dive lo a ni," tiin Rooney a sawichhe duh lo.

Mahse, Stuckmann erawhin a pu ngaihdan a ṭawmpui lo a, Preston keeper kum 33-a upa chuan, "Penalty a ni lo tih chiang takin ka sawi thei. A tluk dan ang chiah khan kan striker kha va tlu ve se penalty an pe lo ang," a ti a, Rooney chuan penalty a hlawhchhuah nana a tluk der a ngaih thu a hrilh niin a sawi thung.

Manchester United boss Louis van Gaal chuan, "Second half-a kan khelh dan khan min ti lawm hle a ni. Goal phur hmasaah ṭang mah ila, goal kan chhuah hnua kan beih let dan kha a chhuanawm takzet a ni," a ti.