Zaninah Liverpool an inlan dawn

Zanin hian UEFA Europa League-ah Liverpool-in Anfield-ah Besiktas an mikhual dawn a, Tottenham Hotspur-in Italian Club ṭha Fiorentina chu White Hart Lane-ah mikhual bawk ang.

2007-08 season khan Liverpool hian Besiktas hi Champions League group stage-ah 8-0 ngawtin an lo sawp tawh a, hemi kum vek hian Besiktas hian an home-ah 2-1 in an lo hneh let ve bawk.

Anfield-ah

Season bul ṭan ṭha lo Liverpool hi tunlai hian an tho leh mek a, an game hnuhnung 11-ah chak loh nei loin an kaltluang leh tawh a ni. League-ah pawh point 42 hmuin pasarihna dinhmun an luah leh tawh. Ke hliam vanga an game hnuhnung pahnih a inlan thei lo English forward Raheem Sterling chu a khelh theih tawh a beiseiawm a, goal khung harsat Liverpool tan hei hi chanchin lawmawm a ni.

Besiktas hi Turkish Super Lig a hma hruai mektu an ni a, Turkey club ṭha Fenerbahce leh Galatasaray te chunga awm thei a ni a, chu chu an dinhmun sawifiahtu a ni.

Liverpool hi Champions League group stage paltlang zo lo hlim an ni a, Group B-ah awmin pathumna an ni. Besiktas erawh Europa League Group C a hmahruaitu an ni thung.

White Hart Lane-ah

Tottenham-in White Hart Lane-ah Italian club Fiorentina an mikhual dawn. Italian football tlak hniam lai a nih avangin Spurs hi team ṭha zawk tura ngaih an ni.

Mikhual team tur Fiorentina hi league-ah palina dinhmun luah mektu an ni a, season thara Champions League khelh tum an ni. Tottenham hi Premier League-ah paruknaah an awm mek a, season thara European Competition khel lo thei dinhmunah an ding.

Tottenham inngahna chu English striker Harry Kane a ni a, Kane hian tun season-ah club tan goal 23 zet a khung tawh a, amah hi London titi a ni.

Inkhel tur pahnih te hi Europa League an game hnuhnung ber a chak zo lo ve ve an ni a, Tottenham hian an group match hnuhnung berah Besiktas chu 1-0 in an hneh lo. An khingpui tur Fiorentina pawh hian an group match hnuhnung berah Dinamo Minsk lakah 2-1 in an tlawm ve bawk.