Tlar dar 4:00-ah Tuikual South leh Khatla TBL
Nizan khan Samsung 3:16 Plan Solution Mizoram Super League match hmasa berah Mission Veng Vikings leh Zarkawt Serpents te'n an khel a, result kan hre hman lo.
Vawiin tlai dar 4:00-ah Tuikual South leh Khatla TBL te'n an khel ve leh dawn a, MSL Playoff champion Tuikual South-in MBBA first division champion lai Khatla TBL an hmachhawn hunah hian game hmuhnawm a beisei theih ang.
Tlai lam ni mah se Hawla Indoor Stadium-ah mipui an ṭhahnem ang.
Tuikual South fiahna
Tuikual South-in playoff match rukah an khingpui zawng zawng an hneh vek a; Khatla TBL lakah playoff-a an record duhawm tak hi chhunzawm zel an tum dawn a ni.
Tuikual South captain F.Zodinthara chuan, "Khatla hi keini aia team hlun zawk leh player en pawha ṭha zawk an ni. Mahse, game a ni a, engkim a thleng thei. Kan inpuahchahna a ṭhat avangin Pathian zarah kan hneh loh chu kan inring bik lo. Theihtawp chhuahin kan bei anga, kan veng mipui te auh phurna nen chuan kan khel ṭha khawp ang," a ti.
Playoff laiin Tuikual South-in khawtlang mipui ṭawiawmna ṭha tak an dawng a, Zarkawt Recreation Center-ah an leng lo a ni ber. Hawla Indoor Stadium-ah pawh mipui ṭhahnem tak an phungkhawm ang.
Tuikual South hi D3 Business Enterprise leh Nextcomm te'n an sponsor.
Khatla khawtlang an phur
Mizoram Super League ṭan hmain Khatla TBL-in Mizoram basketball an thunun a, MSL awm hnuah coach/player H. Laldinsanga hoin thunun chhunzawm zel an tum ang.
Khatla TBL secretary Samuel Lalfana chuan Tuikual South an tum tur chu thlirlawkin, "Kan huphurh hran lo a,ṭha takin kan khel thei turah ka ngai. Kan inbuatsaihna a ṭha a, kan player-te pawh an phur tawh khawp mai," tiin an inpeih tawh thu a sawi.
Khatla TBL hian an match hmasa ber khel turin an state pawn player te la rawn thleng lo mah se Mapuia an nei a, tawnhriat nei ṭha player dang an kawl bawk avangin an zam lo ang.
Khatla hian Tuikual South-in supporter an nei ṭha tih an hria a, tlem bik an tum lo. YMA aṭangin ṭawiawmna an hmu ṭha a, Khatla TBL Basketball Nite an hman ṭuma fans T-shirt hralh zo vek thei an nih avangin ṭantu an khawp ang.