Clarke a lo kir dawn
Australia captain Michael Clarke chu naktuka Bangladesh an khelh hunah a lo kir tawh dawn.
Clarke hi thla hnih chhung inhliam vanga a chawlh hnuin World Cup warm up match-ah UAE an hneh ṭumin Australia tan a rawn kir a, run 64 lai a vawchhuak.
World Cup-a an match hmasa bera England an tum ṭumin Clarke hi a la inlan lo a, coach Darren Lehman-a'n a fitness vangin World Cup match berah a khel tir lo.
Inrinnia Bangladesh nena an inkhelh hunah erawh kum 33-a upa Clarke hi a khelh tawh tur thu Australia coach chuan a sawi.
Australia nena inkhel tur Bangladesh hian an match hmasa zawkah Afghanistan an sawp a, England sawptu Australia hmaah an ṭhat tawk leh tawk loh fiahin an awm ang. Bangladesh-in Australia an hneh hnuhnun ber chu kum 2005 daih tawh khan a ni.
Bangladesh captain Mashrafe Mortaza chuan sawiin, "Hmana kan hlawhtlinna-ah khan kan innghat reng thei tawh lo. Tunah chuan team thar kan ni tawh a, 2005 team ami kha chu keimah chauh ka awm tawh a ni. Mahse, Australia hneh hi thil theih loh a ni lo. Kan bowler teah kan innghat thui a, an la naupan ngaihtuahin theihna an ngah em em a, khawvel spinner ṭha ber ber an ni thei a ni," tiinan spin bowler te chu an innghahna a nih thu a sawi.
Australian fast bowler Mitchell Johnson chuan, "Clarke lokir tur hian minti lawm hle. Amah hi team kaihhruai thiam tak a ni a, a hnuaia khelh thuai thuai hi kan chak tawh a ni, " a ti.