Ka inring tawk - Giroud

Arsenal forward Oli­vier Giroud-a'n inhliam vanga thla thum chhung a chawlh hnuah ngai a awh leh tawh thu a sawi.

French striker Giroud chuan, "Ka game hnuhnung 10-ah goal sarih ka thun tawh a, hei hi ka tan chuan a ṭha takzet a ni. Tlar hmaah player khelh dan inang lo tak tak kan awm khawm a. Anni nena khelh hi a nuam hle a ni. Coach ṭha tak kan nei bakah player naupang ṭha tak tak kan nei a kan team boruak a ṭhain a nuam hle. Ka hliam a dam tawh a tunah chuan inrintawkna nen ka inkhel leh thei tawh ang," a ti.

Kum 28-a upa striker Giroud hi a rawn kir hnuah a khel ṭha leh tawh hle a. FA Cup-a Arsenal-in Middlesbrough an hneh ṭumin goal hnih a khung.

French striker hian Arsenal tan inelna hrang hrangah game 116 a inlan tawha goal 49 a khung tawh a, assist vawi 27 lai nei tawh bawk. Premier League-ah match 84 a khel tawh a, goal 34 khung tawhin assist vawi 16 a nei tawh bawk.