2016-ah ka chawl ang - Alberto

Tour de France-ah ṭum hnih champion tawh Spanish cyclist Alberto Contador chuan kun 2016-ah chuan cycle intlansiak aṭang a chawlh tur thu a sawi.

Kum 32-a upa Alberto hian kumin a intlansiak lo awm tur Giro d'Italia leh Tour de France-ah te tel a tum thu a sawi chiang a, mahse 2016 aṭanga intlansiak chawlhsan a tum thu a sawi lang tel bawk.

Alberto chuan, "Ka taksa lamah chuan insawiselna ka nei rih lo, mahse ka kumte a lo tam ve tawh avangin chawlh lam ka ngaihtuah a hun ve tawh a ni. Kumin a intlansiak lo awm turah hian ka theih tawp tak meuh ka chhuah dawn, a chhan chu pakhatna ni chung ngei a intlaksiak hi chawlhsan ka duh a ni," tiin a sawi.

Contador hian kum 2007 leh 2009 khan Tour de France-ah a lo chak tawh a, chubakah 2008 khan Giro d'Italia-ah chak ber a lo ni tawh bawk. Tour of Spain-ah pawh ṭum thum ngawt pakhatna ni tawhin kum 2008, 2012 leh 2014 khan te khan chak ber a lo ni tawh a ni.