West Ham-ah striker thar

West Ham chuan striker Nene chu tun season chhung Upton Park a cham turin contract an ziah pui.

London club hian England international Andy Carroll chu inhliam avangin tun season chhung an chhawr thei tawh dawn lo a, hei vang hian striker mamawh tak West Ham chuan khelhna nei lo Nene an la lut ta a ni. Brazilian forward hian Pathiannia Tottenham nen an inkhelh hunah West Ham squad-ah a tel nghal thei ang.

Nene hian Al-Gharafa-ah January khan a contract neih lai a hmang zo tawh a, contract thar a ziah tawh loh avangin West Ham hi an vanneih phah ta a ni. Kum khatah tranfer ṭum hnih a awm a, contract nei lo player erawh engtik hunah pawh lak luh theih a ni.

Nene chuan, "He hmuna ka lo kal thei hi ka lawm hle a ni. Premier League hi khawvela league harsa ber pawl tiin an sawi ṭhin a, inelna hautak tak ka hmachhawn tur hi ka tan chuan chona thar phurawm tak a ni a, theihtawp ka chhuah ang. Goal khung ka châk rualin ṭhiante goal khung tur siam sak hi ka nuam tih zawng tak a ni bawk," tiin a sawi.

Brazilian striker kum 33-a upa Nene hi Paris Saint-Germain leh Monaco tan pawha lo khel tawh a ni a, PSG tan hian league match 79 khelin goal 39 lai a khung nghe nghe a ni.