Basel leh Porto an inhnehtawk

Thawhlehni zan khan Champions League Last 16 first leg-ah FC Basel-in FC St Jakob Park-ah Porto an mikhual a, 1-1 in an inhnehtawk.

Basel tan Paraguay international Derlis Gonzalez-a'n first half-ah goal hmahruai a khung a, second half-ah Brazilian Danilo chuan penalty aṭangin an si phurh a sut a ni.

Ball an pet

Champions League aṭanga Liverpool petchhuaktu Basel-in bul an ṭan ṭha zawk a, Swiss forward Fabian Frei ball pass ṭha tak chu minute 11-na lekah midfielder Gonzalez-a'n Porto keeper Fabiano dan hman hman loin goal-ah a chantir nghal. Paraguay midfielder hian group stage-ah Real Madrid lamah goal a khung tawh bawk.

Porto lamin an siphurh sut tumin an nawr let a, mahse goal an khung thei bik lo. Portuguese club-in inkhel an thununa Swiss lamin an goal hum him an tum thung. Porto lamin goal khungna hun ṭha an hmu a, Cristian Tello corner pet chu Casemiro-a'n goal zawnah tauh thei lo. Brazlian right back Danilo goal shot ṭha tak chu goal pawnah a chiah a kal bawk. First half-ah 1-0 a ni.

Second half-ah mikhual lam bawkin inkhel an thunun chhunzawm a, Swiss defender-te an thawk rim hle. Keeper Tomas Vaclik a khel ṭha a, Tello goal khung tur chu ṭha takin a dan sak. Casemiro goal khung chu offside tiin an pawm sak a ni lo bawk. Minute 79-naah Danilo chuan an si phurh sutna goal penalty aṭangin a khung a, inkhel tawp thlengin goal dang a loh belh tawh lo.

Yellow card tamna

St Jakob Park-a inkhelah hian Basel player panga leh Porto player pali laiin yellow card an hmu a, Tun season-a Champions League inkhela yellow card phawrh hnemna ber a ni.

Mikhual team Porto-in ball an chang tam zawk a, 63% lai ball posession neiin Basel-in 37% chauh an nei thung. Porto lamin goal khung tumin Basel goal-ah vawi 15 an pet laiin Basel lam hian Porto goal-ah vawi khat chiah an pet a, an goal khungna a ni.

Basel hian kum 1973-74 season hnu lamah Europe inelnaah quarterfinal an thleng leh tawh ngai lo. An record chhe tak hi thai reh duh a nih chuan March 10-a Porto khelmual Estadio do Dragao-a second leg an khelh hunah goal an khung ngei a ngai dawn a ni.

Enge an sawi?

Basel coach Paulo Sousa, "Kan khel ṭha lo hle, kha aia khel ṭha thei kha kan ni. Kan hmelma te harsatna kan siamsak thei meuh lo a, ka aia kan khelh ṭhat kha ka beisei a sin le," tiin team-te'n beisei an phak loh thu a sawi.

Porto coach Julen Lopetegui chuan, "Chak result kan hlawh chhuak zo lo kha kan vanduai a ni. Chak thei turin theihtawp kan chhuah a, khelṭha tel bawk mah ila goal kan khung tam thei lo. Basel khan goal zawnah vawi khat chauh an pet a, goal an khung zui avangin an vannei hle a ni," tiin chak an phu thu a sawi.

Porto tana goal khungtu Martinez chuan, "Kan dinhmun a ṭha rih zawkah ka ngai. Goal dang kan khung belh thei lo erawh kha chu kan tuar ang tih a hlauthawn awm ve deuh. Minute 90 dang khelh hmabak a la awm a, kan home a nih tawh dawn avangin kan zam lo a, kan dinhmnun a ṭha zawkah kan ngai," a ti.