Morgan a la che ṭha thei - Ramprakash

England batting coach Mark Ramprakash chuan an captain Eoin Morgan chu World cup-ah a la chet ṭhat theih thu a sawi.

Morgan hi tunhnaiah a che ṭha lo hle a, a match hnuhnung pangaah match li chu run siam loin a 'duck out'. Hei vang hian Morgan hi sawisel a hlawh nasa hle a, captain ni tlak lo ang hialin tam tak chuan an sawi.

Ramprakash chuan, "Ani aia team kaihruaitu ṭha hi an awm chuang lo. Amahah hian hruaitu nihna a awm a, chu chu mi tamtakin an neih loh a ni. A chakna lai a hre em em bawk a ni," tiin England captain chu a fak hle.

New Zealand captain Brendon McCullum pawhin kum 28-a upa Morgan hi a fak a, "Amah hi champion player a ni a, tumpui atan chuan player thlanawm loh tak a ni," a ti bawk.

England hian an World cup match hmasa berah run 111-in Australia lakah an tlawm a. Tukin zing khan New Zealand nen an match hnihna an khel a, an result kan la hre hman lo.