Germany-ah Real Madrid an chak

Veltins Arena-ah UEFA Champions League champion lai Real Madrid-in Cristiano Ronaldo leh Marcelo te goal hmangin Schalke 2-0 in an hneh. Santiago Bernabeu-ah March 10 khian Last 16 second leg an khel leh ang.

Nilaini zanah Real Madrid-in inkhel an thunun a, quarterfinal lut turin an dinhmun a ṭha hle. Carlo Ancelotti-a'n kartawpa Deportivo an hneh ṭuma starting eleven ngai a hmang lo; Asier Illarramendi aiah player thar Lucas Silva-a'n bul an ṭan a, Brazilian midfielder hi midfield laiah Toni Kroos leh Isco nen an inkawp.

Tlar hmaah Karim Benzema, Ronaldo leh Gareth Bale te an intlar a, defence-ah Pepe a rawn kir a, Raphael Varane nen an awm dun a; ding lamah Dani Carvajal a awm a, vei lamah Marcelo a awm thung. Keeper chu Iker Casillas a ni.

Inkhel chu

Fimkhur takin team pahnihin bul an ṭan a, mualneitu Schalke-in minute 25 chhungin goal chance an ngah zawk. Minute 26-naah Real right back Carvajal-a cross chu Ronaldo-a'n a tauh lut a, 1-0 a ni. Portuguese forward Ronaldo-a'n match thum chhung goal a khung loh hnuah goal a khung leh ta.

Goal luh hnuah Real player-te'n inrintawkna an nei a, minute 32-naah Benzema goal khung tur chu keeper Timon Wellenreuther-a'n a dan sak a; minute thum hnuah German keeper hian Ronaldo a ti beidawng leh bawk.

Schalke-in second half ṭan tirhah bul an ṭan ṭha a, amaherawhchu German club-in an daih rei lo. Real an chungnung leh vat a, goal erawh a lut har hle.

Minute 71-naah Bale leh Isco te inkawpin Ger­man club tlar hnung an ṭhiat a, Spanish midfiel­der hian crossbar a pet per a, Schalke an him.

Schalke-in goal khung theihna an nei a, Kevin-Prince Boateng leh Atsuto Uchiuda thawhrah chu Felix Platte-a'n goal zawnah a pet thei lo. Minute 79-naah Ronaldo-a'n a thiamzia a phochhuak a, a thawhrah sengin Brazilian wing back Marcelo-a'n goal ropui a khung.

2-0 a nih hnuah Real an chungnung chhunzawm a, goal erawh a luh belh tawh lo.

Real Madrid hian Champions League-ah a zawnin match 10 chhung an khingpuite an hneh tawh a, 2013-a Bayern Munich record siam an tluk pha chiah.

Real an him

Santiago Bernabeu-ah kum 10 chhungin Barcelona leh Juventus te chiah goal hnih emaw aia tama Real hneh thei an awm. Chuvangin Schalke hmabak hi a awlsam lo khawp ang.

RonalGoal

Portuguese star Ronaldo hian Manchester United tan khan match 55 a khel hman a, goal 16 chauh a khung. Real Madrid a zawm hnuah Ronaldo a che ṭha a, Champions League match 58-ah goal 58 a khung a; a goal khung zawng zawng chu 74 a ni.

Ronaldo hian Barcelona star Lionel Messi a tluk lo. Argentine forward hian Champions League-ah match 92-ah goal 75 a khung a, player ropui pahnih hi an la inel chhunzawm zel ang a, an khaikhin zel bawk ang.

Eng nge an sawi?

Real coach Carlo Ancelotti chuan, "Ronaldo hi goal khung tura piang a ni. Match hnih khat a goal a khung loh vangin kan buai phah lo a, amaherawhchu ama tan hian goal khung hi a ṭha a ni. Statistic atan ringawt a goal khung kha a pawimawh lo a, hmahruaina goal a nih avangin kan chakna theihna chhan a ni," tiin a sawi.

Schalke coach Roberto di Matteo chuan, "Team danglamna chu player quality kha a ni - kan inthau deuh a ni. Real-in goal chance ṭum thum an nei a, vawi hnih an khung. Goal khat tal kan khung ve loh avangin kan tan chuan quarterfinal luh a harsa tawh ang," tiin a hmabak a ko thu a sawi.