MSL zan hnihna Zarkawt hmaa ding tur Chaltlang

Veng awmna aṭanga thlir chuan Chatlang Ryders hi Zarkawt BCA aiin an sang zawk. Zanin dar 8:00 hian Hawla Indoor Stadium-ah table-a sang zawk tur an zawng ang.

Zarkawt BCA

Zarkawt-in Mizoram Super League-ah team pahnih an thawh dawn a, pakhat zawk chu Zarkawt BCA an ni. BCA hi season liamtaa first division champion TBL elpui ber an ni.

BCA hian kum 2014 khan 1st division inhlang­kai chauh mah se team ṭha zingah an tel nghal a, MSL-ah pawh champion tura rinkai an ni.

Zarkawt BCA manager Malsawm­tluanga chuan, "Tun hi Zarkawt BCA kan din hnua kan ṭhat lai ber ni hialin ka hria. Kan practice ṭha a, players kan nei ṭha a, coaching staff leh management lam thlengin kan dan a felfai a, hei hian kan team-ah nghawng ṭha tak a neih ka ring. Chaltlang Ryders hi kan huphurh hran lo," a ti.

Zarkawt BCA tan Dinthar tlangval HT Lalremruata (Mama) chet ṭhat leh ṭhat loh a pawimawh ang a, captain Henry Lalngaihawma a ṭangkai bawk ang. Zarkawt vengchhung titi ber chu Mizoram Super League a ni der tawh a, zanin hian court-ah an thiamna an pho lang ang.

Chaltlang an inpeih

Mizoram Super League khel tur team zingah Chaltlang Ryders hi club hlun ber pawl an ni a, local basketball thih lai ber pawha zuih ral ve ngai lo an ni.

Chaltlang Ryders manager Vanlalbiak­ropuia chuan, "BCA hi kan huphurhna kan nei lo. Player mal khaia han che ṭha tura beisei bik em em nei lo mah ila kan players zingah inhliam an awm lo a, kan in fit ṭha tlang bawk. Pratice-naah kan khel ṭha tluang a, inelna hmachhawn turin kan inpeih tawh," a ti.

Chaltlang mipui an phur a, vengchhungah banner lian tak tak an phochhuak a. Ryders hian YMA aṭangin ṭawi­­awmna an hmu ṭha a, fan t-shirt order pawh a tam tawh hle. Zanin hian Chaltlang mipuiin an veng club Ryders ṭawiawm turin inelna hmun Republic Vengthlang an pan ang.