Chelsea-a cham duh Terry

John Terry-a'n Chelsea tana khelh chhunzawm zel a duhthu a ti chiang. Kum 34-a upa Terry contract hi season tawp rualin a zo dawn a, English defender hian club-in contract thar an ziah pui ngei a beisei.

England captain hlui Terry chuan, "Club nen inbiakna chu kan la nei lo a, kan neih vat erawh ka beisei. Tun hnaiah Eden Hazard-a contract a pawtsei a, chu chu club tana pawimawh hmasa ber niin ka hria. Kei pawhin Chelsea tana khelh zel hi ka duh a, ka khelh danin a phu bawkin ka hria," tiin Belgian forward Hazard contract an pawhsei takah chuan a contract chungchang an sawi pui ve vat a beisei.

Chelsea hian club tana player pawimawh Frank Lampard leh Ashley Cole te chu contract pawhsei sak loin an chhuah tawh a, chuvangin Terry contract hi an pawtsei ngei ngei ang tih a chiang lo.

Terry chuan, "Season liamtaa tranfer-a thil thleng kha chuan minti hlauthawng ve tho mai. Season khat atana contract ziah belh chu ka duh a, thil awm zel dan erawh kan thlir zui zel ang. Football-ah chuan ka hun tawp lam ka thleng tawh a, chawlh hahdam ka duh lo - a tam thei ang ber khelh ka duh a ni," tiin a sawi.

Chelsea academy chhuak Terry hian club tan vawi 600 chuang a inlan tawh a, kum 1998 khan a game hmasa ber khelin goal 63 a khung tawh.