Premier League hun a thleng leh ta Arsenal tum tur Palace ṭha zawk

Selhurst Park-ah zanin dar 8:30 hian Arsenal an leng lut dawn. Gunners tan top four-a awm theihna hun remchang a ni a, Pathianni zanah an chunga awm Southampton leh Liverpool an khelh dawn avangin dihmun siamṭhatna hun remchang a ni.

Season opening match-ah Arsenal-in injury time-a Aaron Ramsey goal hmangin Palace 2-1 in an hneh hram a; Tony Pulis hnuaia Palace team aiin Alan Pardew hnuaia Palace team hi an ṭha tawh zawk.

Kartawp khan FA Cup quarterfinal-ah Palace hian Liverpool lamah Frazier Campbell goal khung hmasa mah se hun tawpah 2-1 in a tlawm a. Arsenal hmachhawn turin Gunner forward Yaya Sanogo an chhawr thei dawn lo a, Arenal player hlui Marouane Chamakh leh Campbell te an inkawp a rinawm.

Palace ang lo takin Arsenal-in FA Cup-ah Championship Middlesbrough lakah awlsam takin 2-0 in a chak. Manager Arsene Wenger-a'n Boro lama goal hnih khungtu Olivier Giroud bakah Danny Welbeck, Santi Cazorla, Mesut Ozil leh Alexis Sanchez te tlar hmaah duh thlan tur a nei a. Midfield-ah Mikel Arteta, Aaron Ramsey leh Jack Wilshere te an inhliam avangin Francis Coquelin kan hmuh a rinawm a, Brazilian defender Gabriel aiah Per Mertesacker a inlan hmel bawk.