Pelle a pawimawh dawn

Pathianni zan dar 9:45-a inkhel tur hi tun kartawp inkhel tur zinga sawi hlawh ber a ni.

Nipui transfer-ah Liverpool-in Saints aṭangin Adam Lallana, Rickie Lambert leh Dejan Lovren te an la lut a, table-ah erawh Southampton an la sang zawk. Ronald Koeman-a enkawl team hian point 46 an hmu tawhin palinaah an awm a, Liverpool aiin point li an sang zawk.

Amaherawhchu Liver­pool hian December 14-a Manchester United an hneh loh hnuah chak loh an nei tawh lo a; an match hnuhnung pangaah vawi li an chak bawk.

Saints tan Graziano Pelle chetṭhat a pawimawh. Italian forward hian season ṭantirh match riat lekah goal ruk a khung nghal a, tunah erawh a chet ṭhat vanglai a pel tawh. Pelle hian December 20-a Everton an hneh hnuah goal a khung leh tawh lo. Forward Shane Long leh Jay Rodriguez te an inhliam avangin Pelle hi Liverpool hmachhawn turin a pawimawh lehzual ang.