Spurs chelhtu Fiorentina

Tottenham leh an mikhual Fiorentina te chu White Hart Lane-ah goal khat ve ve khungin an inhnehtawk.

Europa League Last 32 first leg inkhelah Spurs tan Roberto Soldado chuan inkhel ṭan aṭanga minute rukna lekah hma hruaina goal a khung mah se Fiorentina-in Argentina centreback Jose Maria Basanta hmangin minute 36-naah an siphurh an sut a, goal dang a luh belh tawh lo.

Ningani zan inkhelah hian Tottenham manager Mauricio Pochettino chuan goal 23 khung tawhtu Harry Kane aiah Soldado a luh tir a, Spanish forward hian coach rinna hi goal-in chhang let.

Italian club Fiorentina hian Europe-a an away game hnuhnung 10-ah hneh loh an tawng tawh lo.

Engnge an sawi?

Tottenham head coach Pochettino chuan, "First half-ah khan inkhel kan thunun a, goal khat aia a tam kha khung thei tur chu kan ni. Ka naute khelh danah ka lawm hle. Chak result kan hlawhchhuak zo lo erawh a pawi ka ti. Inkhel pumpui thlirin team ṭha zawk chu kan ni. League leh Europa League hian Champions League khelh theihna chance min pe thei ve ve a, kan ngaih pawimawh a ngai ve ve. Tunah chuan kan inkhelh leh turah rirlu kan pek a ṭul," tiin a sawi.

Fiorentina boss Vincenzo Montella chuan, "Result ṭha tak niin ka hria, a tir lam minute 30 chhung kha kan talbuai deuh a, an game a rangin tharum an ngah em avangin min chhaih buai hle. Spurs khan first half-ah an theihna zawng zawngin an khel a, second half-ah kha chuan kan khel ṭha tawh zawk a ni. Kan khelmual a kan inkhelh hunah chuan kan chak ngei ka ring," tiin a sawi.